Како администрацијата доби натпросечен вработен што може да се клонира

Да создадете дигитален асистент што може да комуницира на начинот на кој комуницираат луѓето, но со експертско знаење, е како да го имате најдобриот вработен со натпросечна меморија, кој е достапен 24/7 и кого може да го клонирате по потреба, за да услужи неограничен број корисници истовремено. Вака Нино Карас, генерален директор и косопственик на „Кодвел“, ги дефинира ботовите што ги креира неговата компанија, а кои работат со помош на вештачка интелигенција, најчесто во сегментот на корисничката поддршка.

Приказната за „Кодвел“ (CodeWell) започна во 2011 година, како услужно ориентирана ИТ-компанија, која работи и на сопствени продукти. Низ годините оваа компанија беше директен соработник на повеќе светски познати брендови, како „Сони мјузик“ (Sony Music Entertainment), „Т-мобиле“ (T-Mobile) и „Хајнекен“ (Heineken), а нејзините продукти се најдоа на страниците и на светски најпознатите магазини и ИТ-портали.

Во 2016 година компанијата започна нов пат, се фокусира на конверзациска вештачка интелигенција и на развој на продукти во тоа поле. Во 2018-та веќе ја разви технологијата за вештачка интелигенција „Кодвел“ (CodeWell AI). Постигнатиот успех преку повеќе проекти базирани на вештачка интелигенција лани доведе до целосна транзиција во продукт-ориентирана компанија.

„Минатата година ја освоивме главната награда на ‘How to Web Spotlight’, еден од најреномираните натпревари за технолошки ориентирани стартап-компании во Централна и Источна Европа, добивме инвестиција и отворивме канцеларија на ’Кодвел АИ’ (CodeWell AI) во Романија“, гордо раскажува менаџментот на компанијата.

Разговараме со Нино Карас, главен извршен директор и коосновач на групацијата „Кодвел“ и „Кодвел АИ“.

Нино Карас / Приватна архива

 

„Блумберг Адрија“ (ББА): Вашето искуство во областа на вештачката интелигенција не е нешто ново и се брои во години и низа проекти. Објаснете ни повеќе за проектите на кои работевте досега со користење вештачка интелигенција.

Нино Карас: „Кодвел“ (CodeWell) е компанија специјализирана во полето на конверзациска вештачка интелигенција. Нашиот главен продукт е „Кодвел АИ“ (CodeWell AI), платформата што овозможува креирање дигитални асистенти што можат да го разбираат кој било јазик со многу висока прецизност и да овозможат комуникација слична на онаа со реален човек. Со „Кодвел АИ“ им помагаме на компаниите да автоматизираат до 90 проценти од целата дигитална комуникација, понекогаш вклучувајќи и процеси на цели оддели, притоа обезбедувајќи подобрено корисничко искуство.

Нашата работа во ова поле започна уште во 2016 година, кога го лансиравме Летц (Letz), асистент за продуктивност, кој ја освои престижната награда за четбот на годината на „Продакт хант“ (Product Hunt), во конкуренција со гиганти како „Гугл“ (Google), „Слек“ (Slack), „Дуолинго“ (Duolingo) итн.

ББА: Што значи да се создаде бот што буквално го заменува човекот?

Нино Карас: Да создадете дигитален асистент што може да комуницира на начинот на кој комуницираат луѓето и истиот тој да биде истрениран како експерт со знаење од обем што е предизвикувачки за просечен човек е како да го имате најдобриот вработен со натпросечна меморија, кој е достапен 24/7 и кого може да го клонирате по потреба, за да услужи неограничен број  корисници истовремено.

Ада, дигитална асистентка во јавниот сектор, производ на „Кодвел“ / Приватна архива на Нино Карас

 

ББА: Ќе работите во насока на подобрување на државната администрација. Деновиве веќе беше најавено дека доаѓа Ада, дигиталната асистентка за администрацијата, која е Ваш производ, заснован на вештачка интелигенција. За што конкретно станува збор?

Нино Карас: Со помош на технологијата „Кодвел АИ“ ја креиравме асистентката Ада, која наскоро ќе биде јавно достапна. Станува збор за дигитален асистент преку кој граѓаните и заинтересираните странски инвеститори ќе можат да добијат релевантни информации и да се запознаат со достапните повици поврзани со програмите за државна помош на Владата на Република Северна Македонија. Ада ќе биде достапна 24/7 да помогне и да одговори на сите најчесто поставувани прашања. Ада ќе ви овозможи да завршите работа за неколку минути додека го пиете утринското кафе, наместо да одите да чекате по институциите трудејќи се да го најдете соодветниот шалтер.

ББА: Вештачката интелигенција е сè попопуларна и поприсутна во денешните бизниси. Сметате ли дека се доведува во прашање опстанокот на одредени професии?

Нино Карас: Верувам дека на краткорочни патеки, со автоматизацијата на многу процеси, ќе се изменат многу професии, овозможувајќи им на луѓето да се фокусираат на покомплексни задачи. Но опсегот на процесите што ќе може да се автоматизираат ќе биде сѐ поголем низ годините, па верувам дека природно на подолги патеки многу професии ќе се трансформираат и нема да постојат во форма или под назив во кој ги познаваме денес.

ББА: Ако направиме анализа, кои се предностите, а кои се слабостите од користењето на вештачката интелигенција? Односно колку таа е од помош за бизнисот и за работниците и дали можеби има некакво негативно влијание?

Нино Карас: Предности има многу, но во контекст на бизнисите/организациите значи автоматизација на процеси, што директно резултира со голема заштеда на време и пари, персонализирно корисничко искуство и пристап до корисниците преку нови канали. Во контекст на работниците значи ослободување од голем дел репетитивни здодевни работни задачи, кои одземаат многу време и можност работниците да го искористат својот потенцијал на најдобар можен начин. За корисниците, пак, значи добивање личен претставник, достапен 24/7, кој може да го обезбеди најдоброто од организацијата според нивните интереси.

Директни негативни резултати од имплементацијата и користењето на вештачката интелигенција нема, но индиректни негативни ефекти може да има, како и со секоја нова иновација воведена низ годините. Споредбата е иста како кога би можеле да се вратиме во 1990-тите години и да го поставиме прашањето за негативниот ефект од воведувањето на персоналните компјутери во бизнисите и секојдневниот живот.

Нино Карас / Приватна архива

 

ББА: Вештачката интелигенција од една страна воодушевува, но од друга внесува страв и скептицизам, особено затоа што човекот често е можеби и премногу внимателен во однос на непознатото. Според Вас, има ли простор за паника и страв од екстремности со нејзиното користење и каква иднина гледате за развој на бизнисот со помош на вештачката интелигенција?

Нино Карас: Секоја иновација се соочува со отпор при прифаќање, се плашиме од непознатото, тоа е природен човечки инстинкт. Но, вештачката интелигенција е веќе присутна во многу форми и ја користиме секојдневно, директно или индиректно, дури и без наше знаење. Тоа што ја прави конверзациската вештачка интелигенција посебна е тоа што им овозможува на луѓето да комуницираат со машините на начин на кој тие секојдневно комуницираат меѓусебно. Овој нов начин на интеракција со машините значи дека веќе не се потребни никакви технички познавања за да добиете одговор на тоа што ве интересира или да извршите некаква комплексна акција со едноставно барање.  Со ова се воведува еднаква достапност до сите типови корисници (без разлика колку се вешти со технологија), се отвораат нови можности и на крајот резултира со голема заштеда на време и ресурси. Затоа сметам дека конверзациската вештачка интелигенција претставува нова ера во дигитализација на компаниите и институциите.

ББА: Освен работата на македонскиот пазар, соработувате и со странски компании. Кои се Вашите досегашни проекти?

Нино Карас: Нашиот главен фокус е странскиот пазар, но соработуваме и со локални компании и институции. Во моментов на платформата „Кодвел АИ“  имаме три дигитални асистенти за македонскиот пазар, а тоа се дигиталниот асистент Славчо на „А1 телеком Австрија“, дигиталната асистентка Ана на „ЈП Водовод и канализација“ - Скопје и дигиталната асистентка Ада за потребите на Владата, која допрва треба да биде објавена.

ББА: Користевте/користите и поддршка од Фондот за иновации и технолошки развој (ФИТР). Го препознава ли доволно државата потенцијалот на новата технологија и фирмите што ги имплементираат новите технолошки можности, за да инвестира или да ги поддржи во развојот?

Нино Карас: Да, ние сме една од компаниите поддржани од ФИТР, за кои сметам дека поставија добар столб за поддршка на многу стартап-компании низ годините.

Навистина ме радуваат иницијативите како  „Националната АИ-стратегија“, како и предизвиците за решавање локални проблеми и дигитализација на процеси. Тоа претставува одличен знак за интересот во државните врвови за имплементација на најновите технологии за подобрување на внатрешните процеси преку истовремена поддршка на иновативните локални компании.

Во моментов нема коментари за веста. Биди прв да коментира...

Остави коментар