Директорот на СВБ продал акции за 3,6 милиони долари пред банкротот

Главниот извршен директор на банката „Силикон валеј“ (СВБ), Грег Бекер, продал акции на компанијата во вредност од 3,6 милиони долари, нешто помалку од две недели пред банката да ги обелодени големите загуби што доведоа до нејзин колапс.

Продажбата на 12.451 акција на 27 февруари била првиот пат во повеќе од една година Бекер да продаде акции во матичната компанија „СВБ фајненшл груп“ (SVB Financial Group), според  регулаторните извештаи. Тој го поднел планот што му дозволувал да ги продаде акциите на 26 јануари.

Во петокот, банката „Силикон валеј“ пропадна по еднонеделните превирања поттикнати од писмото што компанијата го испрати до акционерите дека ќе се обиде да собере повеќе од 2 милијарди долари капитал по претрпени загуби. Објавата предизвика пад на акциите во компанијата, иако Бекер ги повика клиентите да останат смирени.

Ниту Бекер ниту СВБ не одговорија веднаш на прашањата за продажбата на неговите акции и дали извршниот директор бил свесен за плановите на банката за обид за зголемување на капиталот кога го поднел планот за тргување. Продажбата била направена преку труст контролиран од Бекер, покажуваат документите.

Однапред подготвени планови

Нема ништо незаконско во корпоративните планови за тргување како оној што го користел Бекер. Плановите беа воспоставени од страна на Комисијата за хартии од вредност во 2000 година за да се спречи можноста за инсајдерска трговија. Идејата е да се избегнат малверзации преку ограничување на продажбата на однапред одредени датуми на кои извршниот директор може да продава акции, а времето можело да биде сосема случајно.

Сепак, критичарите велат дека однапред договорените планови за продажба на акции, наречени планови 10b5-1, имаат значителни пропусти, вклучувајќи го и тоа дека немаат задолжителни периоди за ладење (анг. cooling-off periods).

 „Ако имало дискусии за зголемување на капиталот во времето кога планот бил усвоен, тоа е многу проблематично“, рече Ден Тејлор, професор на школата „Вотсон“ при Универзитетот во Пенсилванија, кој ги проучува обелоденувањата за корпоративно тргување.

Во декември, Комисијата за хартии од вредност ги финализира новите правила, кои ќе наметнуваат најмалку 90-дневен „период за ладење“ кај повеќето извршни планови за тргување, што значи дека нема да можат да се вршат тргувања според нов распоред, три месеци откако ќе стапат во сила.

Од директорите се бара да почнат да ги почитуваат тие правила на 1 април.

Во моментов нема коментари за веста. Биди прв да коментира...

Остави коментар