Спасувачкиот пакет од 54 милијарди долари што „Кредит Суис“ (Credit Suisse Group AG) го доби во четвртокот ѝ дава шанса да го обнови својот бизнис. Сепак, некои клиенти нема да чекаат да видат како ќе се развива ситуацијата.
Во Азија неколку исклучително богати клиенти продолжија да ја намалуваат својата изложеност на банката во услови на превирања во текот на неделава. На Блискиот Исток некои клиенти побараа од банката да ги претвори депозитите во благајнички записи и обврзници. Во Германија советодавен менаџер за управување со богатство добил прашања од клиенти на „Кредит Суис“ што сакаат да префрлат депозити во неговата фирма.
Ваквите загуби, доколку бидат широкораспространети, во голема мера ќе го искомпликуваат ремонтот што се обидуваат да го спроведат извршниот директор Улрих Кернер и неговиот тим. Спречувањето на повеќемесечниот одлив на клиенти е клучно за закрепнување на погодената швајцарска банка, која забележа нето-одлив од 110,5 милијарди франци (119 милијарди долари) во четвртиот квартал.
Прочитај повеќе
Поради кризата, „Кредит Суис“ ќе земе 54 милијарди долари од централната банка
„Кредит Суис“ ќе добие заем од 50 милијарди швајцарски франци (54 милијарди долари) од централната банка на Швајцарија.
16.03.2023
Акциите на „Кредит Суис“ потонаа, главниот акционер рече „не“ за повеќе инвестиции
Акциите на швајцарската банка паднаа на најниско ниво досега, а нејзините кредитни распони се зголемија.
15.03.2023
Ветеран на „Кредит Суис“ ја напушта компанијата
Нилкант Мишра, еден од главните стратези на „Кредит Суис“ за азиско-пацифичкиот регион, ја напушти компанијата.
15.03.2023
Претседателот на „Кредит Суис“ се откажа од бонус од 1,6 милион долари
Претседателот на „Кредит суис“, Аксел Леман, се откажува од исплата на бонус од 1,5 милион швајцарски франци (1,6 милион долари).
14.03.2023
Откриени пропусти во финансиските извештаи на „Кредит Суис“
Групацијата „Кредит суис“ објави дека открила „материјални слабости“ во постапките за финансиски извештаи за 2022 и 2021 година.
14.03.2023
„Кредит Суис“ загуби еден од најголемите поддржувачи
Инвестициската компанија „Харис асошиејтс“ од Чикаго го продаде целиот удел во банката „Кредит Суис“.
06.03.2023
„Сакаме да вратиме сè што изгубивме“, рече Кернер на конференцијата за инвеститори во вторникот. „И штом ќе стигнеме таму, ќе продолжиме понатаму и повторно ќе го развиваме бизнисот“.
Банката постојано кажува дека е доволно ликвидна, што земањето кредити само ќе го зајакне. Сепак, сè уште не е јасно какви се вкупните финансиски текови или дали заштитниот механизам помага да се привлечат клиентите назад.
Повици од банкарите
Банкарите ги повикуваат клиентите за да ги смират и уверат, истренирани со речениците што ги говорат директорите. Заемодавецот нуди каматни стапки на депозитите што се значително повисоки од конкурентите за да ги поврати средствата, објави „Блумберг“ претходно месецов.
„Во нашите разговори со клиентите во последните неколку недели почувствувавме силна поддршка за банката и нашите вработени“, се вели во соопштението на банката. „Ние сме целосно фокусирани на давање совети и решенија за нашите клиенти“.
Но некои многу богати азиски семејства неделава го забрзаа своето повлекување од швајцарската банка, според три големи приватни фирми што заедно управуваат со милијарди, како и неколку приватни банкари со седиште во Хонгконг и Сингапур.
Една приватна канцеларија во тој регион планира да намали дури 30 отсто од парите што ги чува во проблематичната банка, откако менаџер за управување со богатство не успеал да ја увери дека клиентите што не се од Швајцарија ќе бидат заштитени во случај на колапс, посочува еден соговорник.
Меѓу оние што зборуваа за различни движења на клиентите се и вработени во банката и надворешни советници, но сите побараа да останат анонимни, за да го заштитат својот деловен статус.
Некои клиенти на Блискиот Исток побараа од банката да ги префрли нивните готовински депозити во хартии од вредност, што им дава поголема сигурност за да ги задржат парите во фирмата, нагласи друг извор запознаен со случувањата. Менаџерите на богатство во Европа исто така зборуваа за одливи во четвртокот.
Други изгледаат помалку загрижени, а еден советник на неколку фонда рече дека им препорачува на клиентите да ги задржат своите депозити во банката, иако тие далеку ги надминуваат износите покриени со осигурувањето на депозитите во земјата. Тој рече дека е уверен оти нема ризик бидејќи швајцарската влада никогаш нема да дозволи „Кредит Суис“ да пропадне.
Болни месеци
Повлекувањето на клиентите ризикува да го продолжи трендот што се протега неколку месеци. Во ноември банката објави дека нето-одливот на средства изнесувал околу 84 милијарди швајцарски франци во првите неколку недели од кварталот, по лудилото на социјалните мрежи за финансиското здравје на банката што ги исплаши клиентите. Постои загриженост дека понатамошните одливи би можеле трајно да му наштетат на одделот за управување со богатство, кој минатата година веќе се слизна во загуба пред оданочување.
Одливите продолжија и овој месец, иако се стабилизираа на многу пониски нивоа, според годишниот извештај на банката објавен во вторникот, истиот ден кога Кернер за телевизијата „Блумберг“ изјави дека банката забележала приливи во понеделникот. Еден ден подоцна, акциите на неговата банка паднаа откако нејзиниот најголем акционер ја отфрли можноста за поголем удел, вознемирувајќи ги инвеститорите што веќе беа на работ откако три регионални американски банки пропаднаа за неколку дена.
Клучна ќе биде и поддршката од партнерите на „Кредит Суис“. Со месеци најголемите банки во САД ја намалуваат својата директна изложеност на „Кредит Суис“, која падна од една во друга криза. Фирми како „ЏП Морган“ (JPMorgan Chase & Co), Банката на Америка (Bank of America Corp.) и „Ситигруп“ (Citigroup Inc.) им соопштиле на регулаторите дека нивната изложеност сега е минимална, изјавија за „Блумберг“ извори запознаени со ова прашање.
Оваа недела, париската БНП (BNP Paribas SA) исто така ја намали својата изложеност, велејќи им на клиентите дека повеќе нема да прифаќа таканаречени новации каде што од БНП се бара да склучува договори за финансиски деривати во кои „Кредит Суис“ е друга страна, посочија луѓе запознаени со случувањата.
Ваквиот развој на настаните делумно доаѓа оттаму што објавата од четвртокот, иако ја намали загриженоста за ликвидносната на заемодавецот, не ги отстрани прашањата за тоа како „Кредит Суис“ може успешно да се реструктурира.
По почетниот раст од 40 отсто, акциите оттогаш намалија некои од тие добивки. Заштитниот механизам „треба да послужи за стабилизирање на тековниот предизвик со кој се соочува 'Кредит Суис'“, рече Џери дел Мисие, главен инвестициски директор во „Копер стрит“ (Copper Street Capital) и поранешен главен оперативен директор во „Барклис“ (Barclais Plc). Но „нивните структурни проблеми нема да исчезнат“.
.webp){kind=icon}
