Светската банка одобри 700 милиони евра за Македонија

Со новата рамка за партнерство на Македонија со Светската банка, земјава во наредните четири години ќе има на располагање 700 милиони евра, кои ѝ се доделени и одобрени вчера од бордот на извршни директори на оваа меѓународна финансиска институција.

Од Светската банка и од Владата соопштија дека претседателот на Владата, Димитар Ковачевски, и министерот за финансии Фатмир Бесими денеска се сретнале со директорката на Светската банка за Западен Балкан, Шиаочин Ју, и со директорот на Канцеларијата на Светската банка за Северна Македонија и Косово, Масимилијано Паолучи.

„Надградувајќи го успешното 30-годишно партнерство, групацијата Светска банка и Северна Македонија ќе соработуваат во зајакнување на конкурентноста на земјата, развивање на човечкиот капитал и зајакнување на отпорноста на климатските промени“, велат од Светската банка, цитирајќи ја новата стратегија за периодот 2024-2028 година, дискутирана денеска од страна на бордот на извршни директори на групацијата Светска банка.

Оттаму додаваат дека стратегијата ја истакнува потребата за Северна Македонија да го поттикне растот во создавање повеќе работни места во контекст што продолжува да се потпира на микро и мали претпријатија со ограничен пристап до вештини и финансии потребни за иновации и раст на сѐ поконкурентни домашни, регионални и глобални пазари. „Немањето доволно можности за динамични работни места ја поттикнува имиграцијата, ги продлабочува демографските предизвици и го попречува подобрувањето на продуктивноста“.

Фатмир Бесими и Димитар Ковачевски/Влада на С. Македонија

„За да се одржи развојот на Северна Македонија, приоритет е создавање привлечни работни места, особено за младите“, вели Масимилиано Паолучи, директор на Канцеларијата на Светската банка за Косово и Северна Македонија. „Тоа значи дека треба да создадеме услови за приватниот сектор да биде двигател за раст и создавање работни места, подобрување на основните вештини кај децата и подобрување на социјалните и здравствените услуги, и на тој начин Северна Македонија да се развива како атрактивна инвестициска дестинација“.

Парите од рамката се за финансирање придружено со советодавни програми и техничка помош, иако во соопштението од Светската банка е наведено дека тие 700 милиони евра се за следните пет, а не четири години.

„Новата рамка за партнерство содржи приоритети што се дизајнирани заедно со Светската банка во повеќе области и е насочена кон подобрување на достапноста и квалитетот на јавните услуги, подобрување на опкружувањето за отворање нови, подобро вреднувани работни места во приватниот сектор, како и зајакнување на отпорноста на климатските промени и намалување на јаглеродните емисии“, истакна премиерот Димитар Ковачевски на средбата со претставниците на Светската банка.

Шиаочин Ју и Масимилиано Паолучи/Влада на С. Македонија

Премиерот Ковачески додаде дека досега преку ова партнерство се поддржани проекти од 404 милиони американски долари и дека со новата рамка таа поддршка се искачува на 1,1 милијарда американски долари.

Од Светската банка додаваат дека стратегијата исто така ќе го поддржи преминот кон почисти извори на енергија, имајќи предвид дека Северна Македонија во моментов се потпира на високозагадувачки лигнит и нафта за 70 отсто од своите енергетски потреби и за проширување на климатски отпорна инфраструктура за да се ублажи влијанието на поплави, лизгање на земјиштето и шумски пожари.

Зелената транзиција ќе добие значителен поттик од зголемената поддршка од Меѓународната финансиска корпорација (ИФЦ), членка на групацијата Светска банка.

„Потребно е вклучување на приватниот капитал за инвестирање во обновлива енергија и енергетска ефикасност, за да се одржи траекторијата на одржлив развој на Северна Македонија“, истакна Никола Маркие, регионален директор за Западен Балкан при ИФЦ. „Ние исто така сме посветени кон проширување на пристапот до финансирање микро, мали и средни претпријатија и инвестирање во модерна комерцијална и индустриска инфраструктура“.

Покрај дискусијата за новата стратегија за Северна Македонија, бордот на извршни директори на Светската банка минатата недела одобри два нови инвестициски проекта за земјава. Вториот проект за подобрување на социјалните услуги во износ од 27,5 милиони евра се усогласува со севкупната стратегија за зајакнување и проширување на реформите, со цел да се подобрат пристапот и квалитетот на социјалните услуги, како и раното детско образование и грижа. Триесет и еден милион евра дополнително финансирање за проектот за надградба и развој на патиштата ќе ѝ помогне на Северна Македонија за подобрување на транспортната поврзаност по должината на делницата од коридорот 8, помеѓу Скопје и Деве Баир. 

Во моментов нема коментари за веста. Биди прв да коментира...

Остави коментар