Се наѕира ценовна војна на пазарот на електрични автомобили

Почнува ли ценовна војна на пазарот на електрични автомобили, прашува Германскиот автомобилски клуб АДАК (ADAC) откако „Тесла“ во два наврата годинава ги намали цените на своите возила, а овој чекор ќе го следи и „Фолксваген“.

„Тесла“ ги намали продажните цени за автомобилите „модел 3“ и „модел ипсилон“. Првиот сега е достапен со почетна цена од 43.990 евра (6.000 евра поевтино од претходно), варијантата со максимален опсег може да се купи за 53.990 евра (минус 5.500 евра), а моделот со перформанси за 60.990 евра (2.500 евра заштеда). Кај „модел ипсилон“, почетната цена е дури за 9.100 евра поевтина и сега овој автомобил е достапен за 44.890 евра. Варијантата со максимален опсег сега е достапна за 2.000 евра помалку и чини 54.990 евра. Верзијата со перформанси се продава за 64.990 евра, што е за 500 евра помалку од претходно.

„Фолксваген“ го следи примерот

„Фолксваген“ реагира на намалувањето на цената кај конкурентскиот производител на е-автомобили. Како што пренесува „Ханделсблат“, „Фолксваген“ наскоро ќе го понуди својот електричен модел „ИД3“ за помалку од 40.000 евра. Имено, се очекува основниот модел на ова возило да се продава по цена од 39.995 евра, почнувајќи од крајот на овој месец. Моментално најевтиниот модел од овој автомобил чини нешто под 44.000 евра.

Набргу откако се дозна дека „Тесла“ сака да ги продава поевтино моделите „ипсилон“ и „3“, „Форд“ ја намали цената на електричниот „мустанг мах-е“ во САД и сега го нуди за 5.900 долари помалку. Дали ова ќе се случи и во Германија? Портпаролот на „Форд“ не можеше да даде конкретен одговор на прашањето на АДАК.

„Во моментов, за жал, не можеме да одговориме на прашањето за можното намалување на цената на ’мустанг мах-е’ со да или не. Намалувањето на продажните цени објавено од ’Форд мотор компани’ се однесува на Северна Америка. Дали или како оваа објава ќе влијае и на Европа и на Германија во моментов е отворено“, рече тој.

Кои се причините за намалувањето на цените кај „Тесла“?

Како можна причина за огромните попусти во „Тесла“ се наведува желбата на  производителот да го продаде нагло зголемениот обем на производство. Меѓутоа, со оглед на порастот на цените на електричната енергија низ светот, оваа продажба би можела да се забави во 2023 година. „Тесла“ веќе реагира на сè потешката средина со огромните попусти. На крајот од краиштата, колку се повисоки цените на струјата, толку електричните возила стануваат помалку атрактивни.

Bloomberg

Покрај тоа, според експертите, „Тесла“ има релативно ниски трошоци за производство и затоа може да понуди возила по пониска цена. Поради атрактивните влезни цени, „Тесла“ може дополнително да го прошири својот удел на пазарот и да изврши притисок врз голем број конкуренти. Имено, многу од конкурентите ги ценат своите модели многу високо и тие сега изгледаат помалку привлечно во споредба со почетните цени на „Тесла“.

Попуст и за автомобилите што се веќе нарачани

Вообичаено, при продажба на возила важат цените предвидени во купопродажниот договор. Како што краткорочното зголемување на цената не може да биде на сметка на купувачот, тој не може да има корист ниту од краткорочното намалување на цената по склучувањето на договорот. Меѓутоа, ова не е случај со „Тесла“. Кај оваа компанија, клиентите можат да ја откажат нарачката во секое време додека возилото не биде испорачано. „Тесла“ автоматски го префрла намалувањето на цената.

Во писмото на „Тесла“ до купувачите се вели: „Денес воведовме нови цени за ’модел 3’ и ’модел ипсилон’. Вашата нарачка ќе биде ажурирана во следните 48 часа, за да можете да имате корист од најновите цени“.

Намалувањето на цената секако е досадно за оние купувачи што во последните недели и месеци купиле и презеле возило по скапи цени. Тие немаат корист од актуелното намалување на цените, освен ако не користат заобиколен пат. Ако сте го финансирале вашето возило или сте го склучиле договорот користејќи само средства за комуникација на далечина (продажба на далечина), тогаш може да има право на повлекување.

Имено, секој потрошувач што го купил својот автомобил преку телефон, факс, писмо, е-пошта или преку интернет (продажба на далечина) има право на повлекување од 14 дена.

Половните автомобили ја губат вредноста

Меѓу губитниците од ценовната борба на пазарот на електрични возила се најдоа и дилерите на автомобили и сопствениците на „Тесла“, кои моментално ги продаваат своите користени возила. Цените на половните автомобили „тесла“ паѓаат пропорционално со намалувањето на цената на новите возила.

Во моментов нема коментари за веста. Биди прв да коментира...

Остави коментар