„Тесла“ (Tesla Inc) ќе гради нова фабрика за батерии во Шангај, зголемувајќи ги инвестициите во Кина во време на тензии меѓу Пекинг и Вашингтон. Компанијата ќе го произведува својот „Мегапак“ (Megapack), единица за складирање енергија во новиот објект, кој претставува проширување на фабриката за електрични возила во Шангај.
Компанијата предводена од Илон Маск, за кого се вели дека ќе ја посети Кина овој викенд, го објави ова на церемонијата на потпишување на проектот во Шангај, каде што присуствуваше Том Жу, виш потпретседател за автомобилска индустрија на „Тесла“, како и владини претставници на Шангај, вклучувајќи го и заменик-градоначалникот Ву Кинг, а потпретседателот на „Тесла“, Тао Лин, го потпиша договорот.
Изградбата треба да започне во третиот квартал оваа година, а планот е фабриката да почне со производство во вториот квартал од 2024 година, се наведува во соопштението на компанијата.
Продлабочувањето на кинеската инвестиција на „Тесла“ доаѓа набрзо откако француски „Ербас“ (Airbus SE) ги објави плановите да го удвои својот производствен капацитет во земјата за еден од своите најпродавани авиони. Според договорот потпишан во четвртокот во Пекинг, од страна на главниот извршен директор Гијом Фори, европскиот производител на авиони ќе воведе втора финална линија за склопување на „А320“ со тесни каросерии во својата постојна фабрика во Тијанџин.
Новите производствени проекти даваат поттик за кинеската индустрија бидејќи други фирми, како „Епл“ (Apple Inc.), го преиспитуваат производството во земјата во услови на зголемени тензии со САД, кои се интензивираа поради неколку причини, почнувајќи од наводниот кинески шпионски балон што беше соборен над американското небо, па до партнерството на Пекинг со рускиот претседател Владимир Путин.
„Мегапак“ е замислен како масивна батерија, која ќе помага во стабилизирањето на енергетските мрежи, при што компанијата вели дека секоја единица може да складира доволно енергија за да напојува во просек 3.600 дома за еден час.
Новата фабрика првично ќе произведува 10.000 парчиња на годишно ниво, а производите ќе се продаваат низ светот. Кина, која е дом на растечката глобална ѕвезда за електрични возила „Бид“ (BYD Co), е исклучително важен пазар за „Тесла“. Нејзината постојна фабрика за автомобили на периферијата на Шангај, која целосно ја поседува американската фирма, произведе речиси 711.000 автомобили минатата година, или 52 отсто од вкупното производство на светско ниво, дури и кога производството беше нарушено од сега напуштената политика за нулта ковид на Кина.
.webp){kind=icon}
