ЕСГ стандардите наскоро ќе бидат лиценца за работа на компаниите

Одржливиот бизнис или попознат како ЕСГ (ESG од англиски: Environmental, Social и Governance) наскоро ќе стане лиценца за работа за сите компании. Оние фирми кои нема да бидат во возот ЕСГ ќе мора да плаќаат големи даноци поради емисиите на јаглерод диоксид, што од друга страна ќе ги направи неконкурентни на пазарот.

И не само тоа, повеќе од 50 отсто од потрошувачите, особено помладата генерација, избираат производи кои се направени на одржлив начин. Тоа значи дека бизнисот со ЕСГ треба да стане секојдневие за компаниите, но и пат до повисоки профити. Ова се клучните заклучоци на панелот „Максимизирање на целта и профитот: примери на најдобри практики“ кој беше дел од конференцијата „Одржлив бизнис“ организирана од „Блумберг Адрија“ .

Зоран Даљевиќ, директор на претставништвото на „Атлантик Група“, на панелот рече дека оваа компанија го гледа бизнисот ЕСГ како секојдневно работење. Со цел да се намалат емисиите на јаглерод диоксид, компанијата изгради две соларни централи во Хрватска и една во Словенија. Даљевиќ истакна дека соларната централа во Словенија има моќност од еден гигават и дека задоволува 31 отсто од нивната сегашна потрошувачка.

Дополнително, Даљевиќ истакна дека кафето Гранд се пакува во амбалажа која може да се рециклира. „Затоа сме лидери во регионот. Кафето го пакуваме во кеса што може да се рециклира, без да се менува вкусот или свежината на кафето.

Тој вели дека „Атлантик група“ во своето портфолио има кафе „сингл ориџин“ (Single Origin) од Перу кое ја носи ознаката „Реинфорест алијанс“ (Rainforest Alliance), сертификат кој гарантира дека кафето се одгледувало на фарми во согласност со високи стандарди на одржливост со посебна грижа за биолошката разновидност, зачувување на природните ресурси и подобри животни услови на работниците. Благодарение на блокчејн технологијата, „Атлантик група“ успеа да создаде систем за следење на патеката на кафето од плантажата до крајниот корисник. „Тоа не ги интересираше претходните генерации, но новите се многу заинтересирани“.

Bloomberg Adria

Групацијата „Атлантик“ почнала да користи органско сончогледово масло наместо палмино масло за производство на смоки. Даљевиќ најави и дека новата фабрика за смоки ќе се заснова на ЕСГ стандардите, дека ќе има соларни панели и ќе преработува отпадни води.

„ЕСГ е добредојден и неизбежно е да живееме во согласност со неговите стандарди. ЕСГ е тука, нема повеќе да сакаме-несакаме“, рече Даљевиќ на прашањето што би ги советувал другите компании кои се уште не ги прифатиле овие стандарди.

ЕСГ во „Нестле“

Другата панелистка, Марјана Давидовиќ, генерална директорка на „Нестле“ (Nestlé) за Србија, Црна Гора, Северна Македонија, истакна дека компаниите со добра репутација се всушност дел од ЕСГ.

„Практиките на ЕСГ се нешто што ќе биде основа на бизнисот на секоја компанија, ако не денес, сигурно утре. Работниците сакаат да бидат дел од компании кои не уништуваат се околу себе, па сме имале и случаи кога општеството стопира некои проекти кои не се добри за животната средина, исто така, потрошувачите не сакаат да купат производ ако тој ја уништува животната средина во неговиот процес на производство и експлоатација. Тоа ќе биде стандард за работење и лиценца, укажа Давидовиќ.

Bloomberg Adria

Таа посочи дека 70 отсто од емисиите на јаглерод диоксид во нивните производи доаѓаат од земјоделството. „Транспортот, осветлувањето и преработката во нашите фабрики сочинуваат само 30 отсто од испуштениот CO2. Затоа една од работите на кои се фокусираме е регенеративното земјоделство, што е скапа практика на обработка на земјиштето.

Давидовиќ рече дека преку овој процес „Нестле“ ќе ги едуцира добавувачите, ќе им купува опрема, вештачко ѓубриво, висока технологија, се со цел да се произведува храна на одржлив начин. „Тоа е многу важно за нив и за нас.

Таа додаде дека за оваа намена компанијата досега инвестирала околу 800.000 швајцарски франци, а годинава планираат уште еден милион швајцарски франци да инвестираат во процесот на регенеративно земјоделство.

ЕСГ е важен за брендот, персоналот и финансирањето

Јелена Маниќ Петрониколос, раководител на секторот за цели за одржлив развој во Програмата за развој на Обединетите нации (УНДП) во Србија, исто така беше учесник на панелот. Таа посочи дека поимот ЕСГ практично значи дека компаниите водат домашен бизнис и додаде дека тоа е нешто што секој сопственик на бизнис треба да го практикува.

Bloomberg Adria

Таа заклучи дека ЕСГ е важен од три причини. Бренд, или репутација, бидејќи, како што наведе, повеќе од 50 отсто од потрошувачите денес купуваат производи кои се во согласност со одржливиот развој. Втората е дека компаниите кои работат според ЕСГ стандардите привлекуваат квалитетни работници. И третата е дека овие компании полесно добиваат пристап до кредити.

Во моментов нема коментари за веста. Биди прв да коментира...

Остави коментар