Колку струја троши вештачката интелигенција?

Ако го прашате ЧетГПТ колку струја троши вештачката интелигенција, ќе признае - многу.

„Системите за вештачка интелигенција се разликуваат во голема мера во потрошувачката на енергија, во зависност од нивната сложеност и употреба, но генерално бараат значителни количества електрична енергија за ефикасно да ги обработат и анализираат податоците“, ќе ви одговори ЧетГПТ.

Има разлика кој модел ќе го одберете за да прашате. Се проценува дека при обуката на моделот ГПТ3 биле искористени нешто помалку од 1.300 мегават-часа (MWh) електрична енергија или колку што во текот на цела година трошат 130 домаќинства во САД.

Обуката на понапредниот ГПТ4, пак, користела 50 пати повеќе електрична енергија. Сè на сè, компјутерската моќ потребна за одржување на растот на вештачката интелигенција се удвојува приближно на секои 100 дена.

Растат штетните емисии

Големата потрошувачка на струја на вештачката интелигенција стои на патот на зелената транзиција. Во извештај на Светскиот економски форум објавен во јули годинава се наведува дека „Мајкрософт“, кој инвестираше во „Опен еј-ај“, производителот на ЧетГПТ, ги зголемил емисиите на јаглерод диоксид (ЦО2) за речиси 30 отсто од 2020 година поради проширувањето на центарот за податоци.

Емисиите на стакленички гасови на „Гугл“, пак, во 2023 година беа речиси 50 отсто повисоки отколку во 2019 година, главно поради побарувачката за енергија поврзана исто така со центарот за податоци.

Во текот на 2022 година центрите за податоци што се од суштинско значење за вештачката интелигенција потрошиле 460 терават-часа електрична енергија. Оваа бројка се очекува двојно да се зголеми до 2026 година.

Или конкретно објаснето - процените се дека индустријата за вештачка интелигенција би можела да користи енергија колку земја со големина на Холандија до 2027 година.

Употребата на енергија за вештачка интелигенција моментално претставува само дел од потрошувачката на енергија во технолошкиот сектор, што се проценува дека е околу 2-3 отсто од вкупните глобални емисии на штетни гасови.

Но емисиите ќе растат затоа што и компаниите и владите ја зголемуваат употребата на вештачката интелигенција иако за да завршат една задача тие трошат околу 33 пати повеќе струја од стариот добар софтвер.

Колку јаглерод диоксид емитуваат седумте величествени?

Најголемата од групата седум величествени компании од технолошкиот сектор, „Енвидија“, во 2023 година објави дека имала вкупно 73,017 метрички тони јаглерод диоксид, што е значително намалување во однос на 2021 година.

Токму 2021 година се смета се рекордна кога станува збор за емисиите на јаглерод диоксид, биле емитувани вкупно 36 милијарди тони јаглерод диоксид. Најголем придонес во овие емисии имал „Самсунг“, со 20,1 милиони тони јаглерод диоксид.

Следна на црната листа во таа година, според извештај на „Електроникс хаб“ објавен во мај годинава, бил „Амазон“ на Џеф Безос. Компанијата, која исто така влегува во групата седум величествени, емитувала 16,1 милиони тони јаглерод диоксид - тоа е исто како 923 приватни авиони да летале нонстоп во текот на годината.

Да се вратиме на „Енвидија“, компанијата што емитува значително помалку штетни гасови од конкурентите. Но тајванската компанија „Семикондактор“, која ги произведува чиповите на „Енвидија“, во 2021 година имала најголеми емисии на јаглерод диоксид по вработен.

Технолошките гиганти сами бараат лек за болката

Сепак, постои оптимизам дека токму технолошкиот сектор ќе придонесе за намалување на стакленичките гасови од 5 до 10 отсто до 2030 година.

„Енвидија“ веќе работи на суперчип што може да испорача 30 пати подобри перформанси додека користи 25 пати помалку струја.

Вештачката интелигенција може да има улога во поефикасно користење на струјата од обновливи извори во текот на денот кога се јавува хиперпродукција.

„Со анализа на огромни збирки податоци, од временските обрасци до трендовите на потрошувачката на енергија, вештачката интелигенција може да го предвиди производството на енергија со извонредна точност“, пишува во извештајот на Светскиот економски форум.

Овие предвидувања се најважни за најголемите потрошувачи на струја - центрите со податоци. Тие би овозможувале распоред на работните места и менување на оптоварувањето за да се осигури дека центрите за податоци користат енергија само од обновливи извори на енергија - обезбедувајќи оптимална стабилност на мрежата, ефикасност и чиста енергија нонстоп.

Во моментов нема коментари за веста. Биди прв да коментира...

Остави коментар