Со децении, кога германските производители на автомобили сакаа да ја зголемат продажбата на своите седани и спортски возила, тие се потпираа на стотици маркетинг професионалци или, во итни случаи, на позната маркетинг агенција. Оваа година, тие се обратија кај 24-годишната Јаел Мајер.
Таа ја води „Зиам“ (Zeam), швајцарска консултантска фирма која им помага на „Порше“ (Porsche), „Мерцедес“ (Mercedes-Benz) и „Фолксваген“ (Volkswagen) да им продаваат на или да вработуваат луѓе од генерацијата зед. Тоа е група обликувана од постојаната употреба на социјалните мрежи, анксиозноста поради климатските промени, длабоката недоверба кон традиционалниот маркетинг — и претставува „црна дупка“ за конзервативните играчи во германската индустрија.
Но, придобивањето на т.н. „зумери“ е клучно за традиционалните производители на автомобили, бидејќи ривалите кои прво се ориентирани кон технологијата, како што се „Тесла“ (Tesla) и кинескиот БЈД, влегуваат на нивните домашни пазари. Германските производители, кои долго време го одбиваа преминот кон електрични возила, сега се соочуваат со намалена конкурентност и сè уште не нудат пристапни електрични автомобили за помладите купувачи. Иако „Порше“ и „Мерцедес“ имаа одреден успех на социјалните платформи популарни кај генерацијата зед, како што е Тикток (TikTok), производителите на автомобили мора да бидат проактивни за да го задржат вниманието на зумерите, вели Мајер.
„Многу автомобилски брендови се мачат да дојдат до младите купувачи,“ вели таа. „Компанија која не е присутна на нашите социјални канали, за нас воопшто не постои.“
За шпанскиот бренд на „Фолксваген“, „Купра“ (Cupra), „Зиам“ направи тикток кампањи за електронски музички фестивали во Барселона и Кранс Монтана, Швајцарија, за да ја подобри видливоста на брендот кај помладата публика. Консултантите исто така обучуваа менаџери на „Порше“ и „Мерцедес“ како успешно да ангажираат вработени од генерацијата зед.
Bloomberg
Неуспехот да се придобијат „зумерите“ може да има вистински последици. Во Кина, германските брендови се мачат да го следат чекорот со домашните производители како што се БЈД и „Гили“ (Geely), кои продаваат електрични возила по цена под 20.000 долари, со софтвер и гаџети како автомобилот да е пулт за караоке. Минатата година, БЈД го собори „Фолксваген“ од тронот за најпродаван бренд во Кина, каде локалните производители сега доминираат на пазарот на електрични возила.
„Тие ја губат целата следна генерација на купувачи од кинеските автомобилски брендови,“ вели Џо Дитрих, кој заедно со Мајер ја основа „Зиам“ пред четири години. Ако кинеските електрични возила се поевтини и подобри, тогаш „‘произведено во Германија‘ нема да биде доволен аргумент“, вели тој.
Јаел Мајер (лево) и Џо Дитрих
Bloomberg
„Фолксваген“ се врти кон локални партнери како „Експенг“ (Xpeng) и подготвува нов бренд на електрични возила во Кина за да ја промени ситуацијата. Производителот на автомобили бележи силна побарувачка од помладите возачи кога ќе излезе нов модел, но продажбата може да се намали во текот на следната година, вели Штефан Меха, кој ја води кинеската операција на германскиот бренд.
„Тие секогаш имаат желба да преминат на нешто ново,“ вели Меха на маргините на неодамнешен индустриски настан во Германија. Иако тоа не е идеално, тој вели: „Мораме да се обидеме, бидејќи тука е нашата база на клиенти.“
Дел од проблемот е што генерацијата зед е тешка за разбирање. Тие се поотворени за споделување автомобили од нивните родители и често користат повеќе форми на транспорт, вклучувајќи возови и услуги за превоз. Сепак, сакаат да поседуваат и сопствен автомобил. И додека бараат онлајн информации за различни модели, огромното мнозинство претпочита да ги заврши договорите во живо, според анкета на „Карс“ (Cars.com).
„Порше“ вели дека е креативен во обидот да ги придобие младите купувачи, вклучувајќи организирање културни настани и соработки со изведувачи како Дуа Липа.
Цената е на прво место, според студија на „Зиам“ спроведена со „Ју гов“ (YouGov) меѓу „зумерите“ во Швајцарија. Скоро две третини рекле дека би дале предност на купување на поевтин или половен автомобил пред нов или на лизинг. Станува јасно и дека нивниот ентузијазам за технологијата влијае на нивните одлуки за купување. „Зумерите“ ги заменуваат традиционалните пребарувачи со апликации за вештачка интелигенција како ЧетГПТ на „Опен еј-ај“ (Open AI), која Мајер ја нарекува „мојот нов 'Гугл'.“
Тоа значи дека производителите на автомобили треба да бидат свесни за — и да се обидат да влијаат врз — податоците што помагаат во создавањето на истражувачките извештаи на вештачката интелигенција, вклучувајќи ги и објавите на форуми како Редит (Reddit), вели Кристина Шел од „Капџеминај“ (Capgemini Invent) консултантската фирма. „Треба да бидете свесни за препораките што се прават надвор од вашата веб-страница,“ вели таа.
Слична е ситуацијата и со обидите да ги убедите „зумерите“ да работат за некој од германските производители на автомобили, каде највисоките позиции сè уште се „окупирани“ од бели мажи. Иако производителите како „Порше“ ветуваат дека ќе го зголемат уделот на жени во менаџментот, ниту еден германски производител на автомобили никогаш немал жена извршен директор. Тоа не само што ги одвраќа „зумерите“, туку ги намалува и придонесите на жените во индустријата: Иако Карл Бенц го измислил автомобилот во 1886 година, неговата сопруга Берта му помогнала да постигне успех со завршување на првото долгорочно возење две години подоцна.
Мајер и Дитрих минатата година учествувале на состанок на врвниот менаџмент на „Порше“ во Франчиакорта, Италија, каде што го презентирале своето мислење за вработување на „зумерите“. Неколку месеци подоцна, Мајер однела 19 жени кои работат со технологија да ги посетат локациите на „Порше“ во близина на Штутгарт, Германија, да разговараат со менаџери и да се сретнат со млади жени кои веќе работат таму. Повеќето од нив продолжија во „Порше“ на пракса, изјави портпаролка на производителот на автомобили.
„Ни требаат повеќе женски улоги во автомобилската индустрија,“ вели Мајер. „На тој начин, младите жени ќе можат да видат до каде можат да стигнат.“
.webp){kind=icon}
Во моментов нема коментари за веста. Биди прв да коментира...