Што им носи излегувањето на „Јунајтед“ од регионот на „Телеком Србија“ и “Е и ППФ Телеком“?

Давателот на телекомуникациски и медиумски услуги „Јунајтед Груп“ (United Group) излегува од пазарите на регионалните земји кои не се членки на Европската унија, а со последните трансакции отстапи делови од своето работење на емиратско-чешката компанија „Е и ППФ Телеком Груп“ (E& PPF Telecom Group) и на „Телеком Србија“. 

„Е и ППФ Телеком“ постигна договор за купување на 100 отсто од акциите на „Јунајтед Србија Броудбенд“ (United Serbia Broadband - SBB) за 825 милиони евра. Во посебна трансакција, „Телеком Србија“ се согласи да плати 652 милиони евра за купување на 100 отсто од акциите во „Еон ТВ Интернешнл“ (Eon TV International) и „Тотал ТВ“ (Total TV) во Србија и Македонија, како и купување на одредени права, лиценци и други средства поврзани со каналите на „Спорт Клуб“ (Sport Club) за Западен Балкан.

„Телеком Србија“, која е во мнозинска сопственост на Република Србија, објави дека очекува најновата аквизиција да создаде широки синергии, да ги зголеми приходите и да ги намали трошоците. „Овие трансакции се усогласени со стратегијата на ‚Телеком Србија‘ за изградба на водечка телекомуникациска компанија во Западен Балкан, при што приходите ќе достигнат три милијарди евра до 2030 година“.

Bloomberg Adria

Како што веќе напиша„ Блумберг Адрија“, минатогодишниот извештај на Агенцијата за деловни регистри покажа дека Телеком Србија е една од петте најпрофитабилни компании во земјата, со над 34 милијарди динари нето добивка во 2023 година. Сè уште не е објавена листата на најуспешни компании во Србија во 2024 година.

Компанијата соопшти дека - по успешната премиерна емисија на еврообврзници во 2024 година, во износ од 900 милиони долари - купувањето на имотот на „Јунајтед“ дополнително ќе ја зајакне позицијата на „Телеком Србија“ во регионот и меѓу дијаспората на поранешна Југославија. „Овие трансакции не се очекува да ги зголемат сегашните нивоа на долг на ‚Телеком Србија‘“, се вели во соопштението од средата.

„Телеком Србија, како водечка телекомуникациска групација во Западен Балкан, со нетрпение ја очекува можноста да ја зајакне својата понуда на услуги за ДТХ (DTH) и интернет ТВ (IPTV/OTT) за пазарот на дијаспората на поранешна Југославија. Исто така, ја зголемуваме и разновидноста на спортските содржини кои ќе бидат достапни за уште поширока публика во Западен Балкан. Отсега нашите претплатници ќе можат да гледаат и да уживаат во каналите и на ‚Арена Спорт‘ и на ‚Спорт Клуб‘“, изјави извршниот директор на „Телеком Србија“, Владимир Лучиќ.

Аналитичарот на „Блумберг Адрија“, Немања Ѓурѓевиќ, истакна дека од големо значење  за компанијата е тоа што ќе ја збогати својата понуда со дополнителни спортски содржини кои досега беа достапни преку „Арена спорт“, на која сега се додава и „Спорт Клуб“, што придонесува за зајакнување на регионалното присуство на „Телеком Србија“.

„Јунајтед“ излегува од бизнисот надвор од ЕУ

„Јунајтед“ соопшти дека трансакциите, со комбинирана вредност од 1,5 милијарди евра, ја покажуваат силната репутација на групацијата како водечки снабдувач на телекомуникациски и медиумски услуги во Југоисточна Европа и се дел од рационализацијата на нејзиното работење и повторното фокусирање на пазарите на ЕУ. „Овие трансакции се предмет на вообичаени регулаторни одобренија и се очекува да бидат завршени во текот на првата половина на 2025 година“.

„Јунајтед Груп“, во мнозинска сопственост на „БЦ Партнерс“ (BC Partners), има операции во неколку земји, меѓу кои Србија, Словенија, Хрватска, Босна и Херцеговина и Црна Гора, според информациите на нивната веб-страница. Тие се проширија и на членките на ЕУ како Бугарија и Грција.

„Јунајтед“ ќе продолжи да ги поседува и да управува со своите клучни медиуми во Србија, вклучително и Н1 (N1) и Нова С (Nova S). „Овие канали ќе останат достапни на фиксната мрежа на СББ и ќе бидат понудени и на корисниците на ‚Јетел‘ (Yettel)“.

Платформата ЕОН останува во сопственост на „Јунајтед“ и не е предмет на продажба, потврдија од компанијата за „Бета“. „Платформата ЕОН останува сопственост на ‚Јунајтед Груп‘ додека СББ ќе продолжи да ја користи таа ТВ платформа врз основа на долгорочни договори склучени како дел од трансакцијата за продажба“.

СББ има повеќе од 700 илјади активни корисници во земјата, се вели во соопштението на „Јетел“, потврдувајќи дека трансакцијата нема да има никакво влијание врз постојната понуда на телевизиски услуги на СББ. Компанијата нагласува дека СББ е водечки оператор во Србија во областа на широкопојасен интернет и дистрибуција на медиумски содржини, што е комплементарно на бизнисот на „Јетел“, кој обезбедува унифицирани телекомуникациски услуги.

„Овој договор ќе ни овозможи да ги надополниме постоечките услуги што им ги даваме на корисниците на ‚Јетел‘ во Србија, како и да обезбедиме поширока понуда за корисниците на СББ. Сигурен сум дека и двете ќе имаат корист од синергиите што ќе ги донесе оваа трансакција“, рече Балеш Шарма, извршен директор на „ЕиППФ Телеком“. „СББ е добро познат бренд во Србија, ценет поради високиот квалитет на услугите и исклучителниот тим на вработени. За нас во ‚ЕиППФ Телеком Груп‘ ова е прва аквизиција од нејзиното основање и е вистинск пример за стратешкото партнерство помеѓу ППФ и E&“.

Дополнително, како што претходно беше најавено, „Јунајтед“ потпиша необврзувачки договор со „БХ Телеком“ (БХТ) во врска со потенцијалната продажба на „Телемах БХ“ и „Телемах Црна Гора“. „По завршувањето на трансакциите со ‚ЕиППФ Телеком‘, ТС и БХТ, ‚Јунајтед Груп‘ќе ја исполни својата стратешка цел за излез и успешно монетизирање на своите телекомуникациски средства надвор од ЕУ. Нема планови за продажба на други средства на ‚Јунајтед Груп‘ во блиска иднина“, се вели во соопштението на „Јунајтед“.

„Нашата група е изградена на темелите на СББ пред речиси 24 години и прерасна во најголемата телекомуникациска и медиумска компанија во нашиот регион. Денешната продажба е во согласност со нашата стратегија да го изостриме нашиот фокус на пазарите каде што можеме да обезбедиме целосен опсег на мобилни и фиксни телекомуникациски услуги за нашите клиенти, што ќе ни овозможи да го реализираме најголемиот потенцијал за раст и создавање вредност“, изјави изјави извршната директорка на „Јунајтед“, Викторија Боклаг.

Емиратите  веќе некое време го меркале „Јунајтед“

„ЕиППФ Телеком“е дел од државната телекомуникациска корпорација на Обединетите Арапски Емирати, „Емиратс Телекомуникејшнс Група“ (Emirates Telecommunications Group), порано позната како „Етисалат“, а денес скратено како E&. Формирана е во 2024 година преку партнерство помеѓу E& и чешкиот телекомуникациски оператор ППФ - компанија за која пошироката српска јавност дозна откако го купија „Теленор“ (сега „Јетел“) во 2018 година, според веб-страницата на ППФ. Од неодамна, „Јетел“исто така работи под „ЕиППФ Телеком“ како нејзина матична компанија.

„Во третиот квартал на 2023 година, имавме трансакција помеѓу ППФ и E&, во која беа вклучени ‚Јетел‘ и ‚Цетин‘, кои работат во Србија. Купувањето на ППФ и овозможи на E& да направи посилен потег на европскиот телекомуникациски пазар бидејќи во тоа време веќе беше дел од сопственичката структура на ‚Водафон‘ (Vodafone Group)“, рече аналитичарот на „Блумберг Адрија“.

За потсетување, E& поседува значителен удел во споменатиот британски мобилен оператор, а извршниот директор на компанијата од Емиратите, Хатем Довидар, се приклучи на бордот на директори на „Водафон“ во февруари минатата година.

Тој додаде дека може да се заклучи дека потегот на E& е само отскочна штица за она што ја чека телеком индустријата во Европа. „Ако се ограничиме само на Србија, Е& досега работеше како еден од трите мобилни оператори преку ‚Јетел‘ и ‚Цетин‘, со помалку силно упориште во бизнисот со интернет и телевизија“. „По оваа трансакција со која Е& ја купи СББ со цел да го зајакне своето присуство на Балканот, можеме да кажеме дека им се отвори вратата кон овие телекомуникациски услуги“.

ППФ инаку има 50 отсто минус една акција во „ЕиППФ Телеком“, додека Е& е мнозински акционер со 50 отсто плус една акција. „‚ЕиППФ Телеком Груп‘ е водечки телекомуникациски провајдер во Централна и Југоисточна Европа, поттикнувајќи ја дигиталната трансформација и подобрување на поврзувањето преку иновации и стратешки инвестиции“, се додава на веб-страницата. Покрај гореспоменатите „Јетел“ (Бугарија, Унгарија и Србија), групата управува и со О2 (Словачка) и „Цетин“ (Бугарија, Унгарија, Словачка и Србија). Дополнително, „Јетел“ и O2  на потрошувачите, корпорациите и јавниот сектор им обезбедува мобилни, широкопојасни, ТВ и услуги за податоци, додека „Цетин“ обезбедува телекомуникациска инфраструктура на големо.

PPF Group

„Ако го споредиме E& и индексот Stoxx Europe 600 Telecommunications на крајот на третиот квартал од 2024 година, маржата на ЕБИТДА на индексот е 34,88, што е помалку од E&, која генерирала 45,5 проценти. За да се добие уште подобар контекст на супериорноста на E& во однос на телекомуникациските компании вклучени во индексот, би сакал да презентирам уште две информации: бруто-маржата на E& е повисока за околу 20 процентни поени, а задолженоста мерена преку односот на нето долгот кон ЕБИТДА е 2,6 пати помала. Со други зборови, E& е помалку оптоварена со долгови отколку генерално умерено задолжените европски компании според податоците од крајот на третиот квартал на 2024 година“, рече Ѓурѓевиќ.

Тоа, вели, ја става Е& во поповолна позиција за дополнително задолжување за нови инвестиции. „Е& постигна повисока бруто профитна маржа од компаниите вклучени во индексот Stoxx Europe 600 Telecommunications преку оптимизирање на директните трошоци, но помалата рационализација на оперативните трошоци ја објаснува повисоката маржа ЕБИТДА за само 11,5 процентни поени“.

„Блумберг“ уште во мај минатата година објави дека E& е заинтересирана за купување на имотот на „Јунајтед“, додавајќи во тоа време дека мнозинскиот сопственик на „Јунајтед“, „БЦ Партнерс“ работи со финансиски советници за да ја продаде компанијата и ја процени вредноста на нејзиниот имот на осум милијарди евра.

Depositphotos

Изворите на „Блумберг“ тогаш изјавија дека преговорите меѓу E& и „БЦ Партнерс“ се уште се во рана фаза и дека постои можност „Јунајтед“ да биде продаден на повеќе купувачи. „БЦ Партнерс“ очекуваше да започне со формалниот процес на продажба веќе во јуни.

За потсетување, „БЦ Партнерс“купи мнозински удел во „Јунајтед Груп“ во 2019 година од инвестициската компанија ККР, која задржа малцински удел заедно со менаџерскиот тим на операторот.

Минатата година, инфраструктурниот огранок на Саудискиот телеком, „Тавал“, се согласи да купи кули од „Јунјатед Груп“ за 1,22 милијарди евра.                      

Трендови на европскиот телекомуникациски пазар Гледајќи пошироко, телекомуникацискиот пазар во Европа е во средината на консолидација и битка за корисниците, забележува аналитичарот на „Блумберг Адрија“, Немања Ѓурѓевиќ. Тој потсетува на неодамнешната вест за спојувањето на „Водафон“ со конкурентот „Три“ за 19 милијарди долари во Велика Британија. „Ова создава нов лидер на пазарот со над 29 милиони корисници и бројот на оператори се намали од четири на три по оваа трансакција“. Исто така, Саудискиот Телеком плати 2,1 милијарди евра во средината на 2023 година за речиси 10 отсто од сопственоста во шпанската компанија „Телефоника“. „Мерено со мултипликатори, вредноста е 5,23 пати поголема од ЕБИТ - многу слично на она што E& го плати за ППФ. Значи, трендовите покажуваат консолидација на пазарот и борба меѓу другите телекомите за посилно присуство на европскиот пазар", заклучува аналитичарот. Зборувајќи за регионот Адрија, Ѓурѓевиќ се осврна на „БХ Телеком“, која е заинтересирана да ги купи компаниите на „Телемах“ во Босна и Херцеговина, Црна Гора и Северна Македонија, нагласувајќи дека македонскиот пазар е најзаситен. „Речиси и нема простор за поагресивен раст, гледајќи ги работите низ призмата на работењето на ‚Македонски Телеком‘ како лидер на пазарот во таа земја. Компанијата се бори за секој нов корисник, но пазарот не дозволува повеќе од ниско едноцифрен раст за таа компанија. Сепак, растот на приходите се заснова на проширување на оптиката“.

 

„Блумберг Адрија“ е создадена како регионална соработка помеѓу „Блумберг медиа“(Bloomberg Media) и „Мтел Свис“ (Mtel Swiss). „Мтел Свис“ е дел од групацијата „Телеком Србија“.

 

 

 

Во моментов нема коментари за веста. Биди прв да коментира...

Остави коментар