Малите компании најзаинтересирани за парите од унгарскиот кредит

Почнува постапката за распределба на втората транша на парите од унгарскиот кредит наменети за македонските компании. За распределба има уште околу 240 милиони евра.

Развојната банка деновиве го достави барањето до Министерството за финансии за повлекување нови средства „во согласност со барањата на банките, за одобрени проекти наменети за инвестиции и развој на компаниите“, велат од банката за „Блумберг Адрија“.

На почетокот на март Развојната банка ги исплати првите пари за фирмите од унгарскиот кредит. Првата транша беше во вредност од 10,4 милиони евра. Тие пари комерцијалните банки ги распределија на 47 македонски компании, од кои најголем дел се мали.

Според евиденцијата на Развојната банка, најголем дел од кредитите (48 отсто) што ги зедоа првите компании ќе се троши за градежни активности, а околу три милиони евра од првата транша завршија кај производствените компании.

Значително пониска камата

„Блумберг Адрија“ пишуваше дека почетниот интерес за парите од унгарскиот кредит значително го надминуваше утврдениот лимит што го добија банките за користење на средствата.

Интересот е голем поради поволните услови. Имено, рокот на отплата е до 15 години, а компаниите ќе имаат грејс период од три години. Каматата изнесува 1,95 отсто.

Оваа камата е значително пониска од каматите со кои работат деловните банки во земјава. Според статистиката на НБРМ за јануари 2025 година, просечната каматна стапка на вкупните кредити на корпоративниот сектор изнесува 4,85 отсто.

Друг услов за парите од унгарскиот кредит е компаниите да не можат да рефинансираат стари обврски, туку средствата да ги наменат за инвестиции. Услов за апликантите е да обезбедат учество во висина од 20 отсто од бараниот износ

За кредитите можат да аплицираат фирми што не се странски директни инвеститори што користат државна помош. Кредит исто така не може да добијат компании од секторот производство и трговија со алкохол освен со пиво и вино, производство на тутун и компании за коцкање, игри на среќа и слично.

Расте побарувачката за кредити

Компаниите имаат зголемен интерес за кредити воопшто, не само за унгарскиот кредит. Податоците на НБРМ за февруари покажуваат дека кредитите на корпоративниот сектор забележаа месечен раст од 1,5 отсто и годишен раст од 14,3 отсто.

„Анализирано од аспект на факторите што влијаат врз побарувачката на корпоративните кредити, може да се забележи дека факторите од групата поврзани со ’потребите од финансирање’, односно факторите ’инвестиции во основни средства’ и ’инвестиции во резерви и обртен капитал’ придонесуваат за нето-зголемување на кредитната побарувачка“, се наведува во анкетата за кредитната активност на Народната банка.

Инаку, анкетата укажува дека во четвртиот квартал од минатата година има нето-олеснување на вкупните услови за одобрување корпоративни кредити, но послабо во споредба со претходниот квартал.

„Сепак, најголемиот процент од банките (околу 98 проценти) укажуваат на непроменети кредитни услови. Нето-олеснувањето на условите за кредитирање на претпријатијата во четвртиот квартал е во согласност со очекувањата за нето-олеснување дадени од банките во претходната анкета, но послабо. За првиот квартал од 2025 година се очекува натамошно, но поумерено нето-олеснување на кредитните услови за одобрување корпоративни кредити“, велат од Народната банка.

 

 

Во моментов нема коментари за веста. Биди прв да коментира...

Остави коментар