„Мерцедес“ ќе инвестира во кинеската „Чјанли“ за заеднички развој на автономни возила

„Мерцедес-Бенц“ (Mercedes-Benz Group AG) се подготвува да инвестира во „Чонгчјинг Чјанли технолоџи“ (Chongqing Qianli Technology Co.), компанија котирана на берзата во Шангај што развива системи за автономно возење, за да ги зајакне своите софтверски капацитети во Кина, наведуваат добро упатени извори. 

Германскиот производител на автомобили планира да купи малцински удел во „Чјанли“, велат изворите, кои побарале анонимност бидејќи станува збор за приватни информации. Пазарната капитализација на компанијата денеска изнесувала околу 59,5 милијарди јуани (8,35 милијарди долари). Според истите извори, двете страни може да го објават договорот уште неделава.

Еден од главните поддржувачи на „Чјанли“ е „Џеџијанг Гили холдинг груп“ (Zhejiang Geely Holding Group Co.), која предводела иницијативи да го привлече „Мерцедес“.

„Гили“ веќе ги интегрираше своите проекти за автономно возење во „Чјанли“, позиционирајќи ја компанијата како главна платформа на групацијата за идните технологии за паметно возење.

„Мерцедес“ одби да коментира, а одговор не дадоа ниту „Чјанли“ ниту „Гили“.

Инвестицијата ја нагласува сѐ потесната соработка меѓу „Гили“ и „Мерцедес“, кои, според изворите, разговараат и за можност за заеднички проекти поврзани со мотори со внатрешно согорување. Разговорите на ова поле се во почетна фаза.

Германските производители на автомобили ги ревидираат своите стратегии во Кина, ги продлабочуваат локалните партнерства и лансираат модели приспособени за тамошните купувачи во обид да се одржат во чекор со брзорастечките домашни конкуренти предводени од БЈД (BYD Co.) и „Шаоми“ (Xiaomi Corp.). Побарувачката за нивните луксузни електрични возила е слаба поради силната конкуренција што ги намали цените на сериските модели.

Со влезот на „Мерцедес“ како акционер, се очекува „Чјанли“ да соработува со германскиот производител на истражувачки и развојни проекти и да обезбедува технологија за неговите идни модели во Кина, велат изворите.