На повидок партнерство меѓу „Рено“ и кинеската „Чери“ за производство на возила во Јужна Америка

„Рено“ (Renault SA) и кинески „Чери“ (Chery Automobile Co.) водат разговори за партнерство за производство и продажба на автомобили во Јужна Америка, во обид двата производители да го зголемат своето присуство во регионот, посочуваат добро упатени извори.

Разговорите вклучуваат планови за Колумбија и за Аргентина, при што „Чери“ би добил пристап до постојната фабричка мрежа на „Рено“ во замена за обезбедување капитал и дизајн на производи, велат истите извори, кои сакаат да останат анонимни. 

Кинескиот производител би ја користел фабриката на „Рено“ во Енвигадо, Колумбија, за производство на автомобили со мотори на внатрешно согорување. Поголемиот дел од возилата би бил продаван под брендот „Рено“, а остатокот како модели на „Чери“. Во фабриката на „Рено“ во Кордоба, Аргентина, „Чери“ разгледува можност за инвестирање во линија за хибриден пикап, при што „Рено“ би бил генералниот дистрибутер на возилата. Разговорите сè уште траат и не е сигурно дека ќе биде постигнат договор.

Портпаролот на „Рено“ одби да коментира, додека претставниците на „Чери“ исто така не одговорија на барањето за коментар.

„Рено“ веќе бара партнерства за да ги намали трошоците и истовремено да се позиционира на пазарите во развој. Во Бразил компанијата соработува со кинеската „Џеџијанг Гили“ (Zhejiang Geely Holding Group Co.) на производство и продажба на електрични модели и возила со ниска емисија на штетни гасови. Според упатените, потенцијалната соработка со „Чери“ нема да влијае на проектите со „Гили“. Интересот на „Чери“ се засили откако компанијата минатата недела имаше успешно берзанско деби во Хонгконг.

Разговорите започнале кога извршен директор на „Рено“ беше Лука де Мео, велат упатените извори. Неговиот наследник Франсоа Провост наводно зазел повнимателен став кон трошоците во споредба со Де Мео, кој поддржувал заедничко финансирање на експанзијата во Јужна Америка. Според најновите разговори, кинеската компанија би ги финансирала проектите целосно.

„Чери“, која според „Фрост и Саливан“ (Frost & Sullivan) секоја година од 2003-та е најголемиот кинески извозник на автомобили, има искуство со работа со западни компании. Во Кина составува модели на „Јагуар“ (Jaguar) и „Ленд ровер“ (Land Rover), а има и планови за поширок раст во странство поради силната конкуренција на домашниот пазар. Нејзината понуда содржи голем удел на релативно достапни возила на гориво, што ги прави погодни за пазарите во развој.