Изборите за Европскиот парламент во неделата вистински ја потресоа европската економија. Резултатите покажаа подем на екстремната десница, посебно во Франција, па претседателот Макрон се одлучи за брзи избори до крајот на месецот. Еврото падна, а француските обврзници го имаа најголемиот пад од пандемијата во 2020 година.
Ниту бројките за инфлацијата не одат во добра насока затоа што таа може да забрза. Битката не е добиена и сега се поставува прашањето дали релаксирањето на монетарната политика кое почна минатата недела ќе продолжи во септември.
Во САД пак основниот индекс на потрошувачки цени падна на најниско ниво во повеќе од три години, но Фед одлучи да не ја намали каматната стапка. Според сегашните проекции, наместо три пати, Федералните резерви до крајот на годината само еднаш ќе ја намалат стапката.
Каматната стапка остана непроменета и во земјава. И НБРМ и аналитичарите на „Блумберг Адрија“ сметаат дека е рано за релаксирање на политиката затоа што инфлаторниот притисок во мај се засили.
Регионалната анализа на нашите аналитичари пак проектира дека иако има уште многу отворени прашања во однос на каматните стапки, кредитирањето ќе расте. Во земјава, кредитната задолженост на домаќинствата надминува 3,8 милијарди евра, а дури 84 отсто од кредитите се со рок на отплата подолг од една година.
Рок за отплата во јули имаат над 100 милиони евра пари кои државата ги позајмувала во претходниот период по основ на записи и обврзници. Жежок костен за новиот министер за финансии чие име ќе биде познато најдоцна до вторник кога предлогот за новата влада ќе биде доставен до Собранието. Поранешниот премиер пак, Димитар Ковачевски не остана долго без нов ангажман.
Вест на неделата е и одлуката на Европската унија од следниот месец да воведе дополнителни тарифи од дури 38,1 отсто за електричните возила што се испорачуваат од Кина. Одлуката што може да предизвика глобална трговска војна и ќе ги зголеми трошоците за продажба на автомобили во Европа за компаниите, од кинеската „БЈД“ до „Тесла“, не предизвика потрес на кинескиот пазар пред сè затоа што беше очекувана.
Државната статистика неделава објави раст на бројот на туристи во земјава во април. Според податоците, тој месец во земјава имало над 25.000 гости од Турција. Во оваа земја сакаат да летуваат и Македонците кои може да си дозволат да отпатуваат со авион. Анализата покажува дека ова лето чартер летови освен за Турција, имаме само уште кон Тунис и Египет.
.webp){kind=icon}
