.webp){kind=icon}
Денеска во Скопје ќе се одржи конференцијата на „Блумберг Адрија“, „Back to business: Економски потенцијал и развојни можности на Македонија“ . Конференцијата ќе ја отвори претседателот на Владата, Христијан Мицкоски, свое обраќање ќе има директорката за содржина на „Блумберг Адрија“, Јелисавета Лазаревиќ, а нашиот аналитичар Михаел Блажековиќ ќе ја претстави анализата на тема „Отклучување на растот: економија и пазари на капитал во Северна Македонија“.
Со помош на реномирани говорници од земјава и од регионот на конференцијата ќе се обидеме да дадеме одговори на повеќе суштински прашања поврзани со македонската економија, меѓу кои: Колкав е потенцијалот за раст на Македонија? Каков квалитет треба да има тој раст и кој ќе го движи во иднина? Од што ќе биде условен? Како да го одржуваме долгорочно? Дали реалниот сектор држи чекор со напредокот на финансискиот сектор и како иновациите и технолошкиот напредок создаваат нова слика на овој простор?
Еве што уште е важно за почеток на овој вторник.
Балкански шпион 2.0: Како сајбер-заканите го освојуваат регионот
Полицијата во Словенија пред неколку месеци истражуваше случај на сајбер-измама во која една фирма претрпела штета од околу 62.000 евра. Се покажа дека директорот одговорил на лажен мејл, кој изгледал како да го испратила техничката поддршка на банката, и во него ги споделил пристапните податоци за електронско банкарство.
Измамниците успеале да извршат трансакции од 207.000 евра, но банката, за среќа, успеала да запре дури 145.000 евра од тие уплати пред парите да стигнат до измамниците.
Сајбер напади: нема цена за која хакерите сигурно ќе ги вратат податоците
Во последните неколку години, бројот на рансомвер (ransomware) напади на глобално ниво значително се зголеми, а Македонија не е исклучок. Се работи за злонамерен софтвер што трајно го блокира пристапот до личните податоци на жртвата, освен ако не се плати откуп. За разлика од поедноставните софтвери што може да ја остварат целта без да ја оштетат датотеката, рансомвер ги шифрира датотеките на жртвата, правејќи ги целосно недостапни и без клучот за дешифрирање податоците не може да се вратат.
При тоа, најчесто за откуп се користат дигитални валути кои тешко се следат и на тој начин гонењето на сторителите се претвора во многу тешка мисија.
Разумни очекувања за раст на профитабилноста на „Валамар Група“
„Валамар Група“ во првите девет месеци оствари пораст на приходите од продажба на ниво од 11,6 отсто годишно, а во третиот квартал од годината беше остварен двоцифрен раст на приходите на ниво од 10,2 отсто годишно. Растот на приходите доаѓа на крилата на двоцифрениот раст на цените, а просечната дневна цена достигна ниво од 138 евра во првите девет месеци, односно е за 14,4 отсто повисока од лани.
Зголемувањето на цените се оправдува со фактот што оперативните трошоци и понатаму нудат цврст отпор со раст од 16,3 отсто на годишно ниво, што доведува до пад на нивото на ЕБИТДА маржата на 37,7 отсто (-2,6 п.п.). И покрај ова, растот на ЕБИТДА и понатаму е присутен на ниво од 4,9 отсто годишно (4,6 отсто нормализирано). Во третиот квартал, ЕБИТДА речиси целосно го следеше растот на приходите со раст од 8 проценти годишно, со што постепено се намалува ефектот од претходното отворање на хотелот во првиот квартал, што остави негативни последици врз профитабилноста со оглед на сезонското деловно работење.
„Фолксваген“ планира затворање на три фабрики во Германија
Главниот синдикален лидер на „Фолксваген“ изјави дека најголемиот европски производител на автомобили планира да затвори најмалку три фабрики во Германија како дел од големата акција за намалување на трошоците со цел компанијата да стане поконкурентна.
Плановите, исто така, вклучуваат намалување на платите од 10 отсто во водечката фабрика на „Фолксваген“ и кратење во сите преостанати фабрики во земјата, рече шефицата на работниот совет Даниела Кавало, која исто така е член на надзорниот одбор на компанијата во Волфсбург, Германија.
Глобалното затоплување ќе стане уште поопасно
Температурата ќе расте и во следните години затоа што светот ја пропушта целта за намалување на штетните емисии. Во најновата анализа на Агенцијата на Обединетите нации уште стои дека голема е веројатноста глобалното затоплување да биде уште поопасно.
Според овој извештај, лани била регистрирана рекордна концентрација на стакленички гасови во атмосферата, а се зголемило и нивото на метан и азот оксид. Јаглерод диоксидот се акумулира побрзо од кога било во атмосферата, зголемувајќи се за повеќе од 10 проценти за две децении.
