.webp){kind=icon}
Главниот аналитичар на „Блумберг Адриjа“, Андреј Кнез, вели дека регионот забележал едно од најсилните зголемувања на цените на недвижностите во Европа и дека сите земји забележале посилен годишен раст од просекот на ЕУ, па дури и на еврозоната.
„Интересно е затоа што во регионот сите земји бележат демографски значаен ефект, а тоа е дека младите доста доцна го напуштаат родителското гнездо. Во просек, четири години подоцна, на возраст од 30 години, а просекот на европско ниво е 26. Ова е интересен фактор за дефинирање на цената на недвижностите, а таквиот тренд не е променет во последните 15 години“, изјави Кнез за Блумберг Адрија ТВ.
Според него, може да се заклучи дека ваквите силни движења на цените на недвижностите се резултат на зголемувањето на каматните стапки, растот на реалниот доход до оваа година, некои специфични фактори - доселувањето бегалци во Србија, акумулираните заштеди, зголемувањето на цената на градежните материјали.
Очекувањата на аналитичкиот тим на „Блумберг Адрија“ се дека ќе има забавување, а потоа и пад на градежната активност, бидејќи тоа е сектор на кој брзо се одразува влијанието на целиот економски момент.
„Во 2023 година очекуваме значително негативно влијание на целокупната економска активност врз градежната индустрија, а дополнително негативно ќе се одразат растот на цените на задолжувањето и скапите материјали“, рече Кнез, наведувајќи дека има и одредени позитивни влијанија што би можеле да го ублажат ова и го посочи примерот на Хрватска, во која се очекуваат проекти финансирани од европските фондови во износ од две милијарди евра.
Што се однесува до цените на недвижностите, се предвидува дека во наредната година ќе има просечен пад во регионот од најмалку 10 проценти во однос на сегашните нивоа.
„Нема да биде изненадување, бидејќи сме на надолна траекторија со растот на градежните дозволи, што ќе се прелее на побарувачката на недвижности кога ќе бидат изградени, скапото финансирање влијае и на побарувачката од купувачите, расте недовербата, што е одраз на целокупната економска клима и фактот дека банките ги заоструваат условите во однос на одобрувањето кредити. Можеме да заклучиме дека цените на недвижностите ќе се намалат“, заклучи Кнез.
