Арапскиот бизнисмен Саиф бин Мархан Алкетби станува нов сопственик на 43,4 отсто од акциите во групацијата „Фортенoва“, поранешен „Агрокор“, беше објавено од повеќе извори во средата вечер.
Агенцијата „Ројтерс“ се повикува на кратко соопштение од руската Сбербанк, во кое се наведува дека уделот му е продаден на инвеститор од Обединетите Арапски Емирати (ОАЕ).
Од загрепската агенција „Милениум промоција“, која ја претставува канцеларијата на Саиф Алкетби, стигна соопштение во кое се наведува дека „ова е почеток на периодот на стратегиски инвестиции на Саиф Алкетби во Република Хрватска“ и дека се убедени оти оваа инвестиција ќе биде „исклучително корисна за групацијата ’Фортенова’ и за хрватската економија“. Оттаму, исто така, забележуваат дека трансакцијата сè уште треба да биде одобрена од надлежните регулатори.
Од групацијата „Фортенова“ стигна порака дека немаат никакви „официјални информации“ за продажба на акциите на Сбербанк.
„Имотот на Сбербанк е под санкции и за купопродажба, потребно е да се добијат посебни дозволи од надлежните органи за спроведување на санкциите. Првиот потенцијален купувач на акциите на Сбербанк, унгарски 'Индотек', не успеа да ги добие тие дозволи. Во вториот обид, односно продажбата на пензиските фондови, дозволите беа добиени, но претставниците на германски 'Алијанц' во Надзорниот одбор на фондот АЗ ja прекинаа купопродажбата“, објаснуваат од „Фортенова“.
Избегнување на санкциите
„Не се добиени дополнителни дозволи за продажба, oдносно не гледаме како можело да се случи валидна купопродажба. Исто така, по пензиските фондови, немало други длабински снимања на компанијата. Доколку дошло до избегнување на санкциите, тоа е кривично дело и компанијата не учествувала во тоа“, одговорија од групацијата „Фортенова“.
Финансиските детали за трансакцијата, за која се вели дека е завршена на 31 октомври, не се откриени. Сбербанк со свој удел во групацијата „Фортенова“ заврши по имплозијата на „Агрокор“, но поради санкциите што во меѓувреме беа воведени кон руските компании поради инвазијата на Украина, не можеше да располага со сопственичките права на хрватската компанија.
Со новата ситуација дополнително се усложнува сопственичката состојба во една од најголемите хрватски и регионални компании. Бидејќи Сбербанк не може да ги оствари своите права, најголем акционер со право на глас во моментот е хрватскиот претприемач Павао Вујновац, претседател на Управниот одбор на групацијата „Енергија натуралис“, која управува со 20 компании од енергетиката, логистиката и прехранбената индустрија.
Павао Вујновац, претседател на Управниот одбор на групацијата Energia Naturalis / Bloomberg Adria
Вујновац е најпознат по тоа што ја контролира и ППД, компанија за трговија со природен гас, а во неодамнешното интервју за „Блумберг Адрија“ откри дека не го интересира долгорочното управување со „Фортенова“, туку нејзината продажба. „Фортенова“ првично планираше да ги откупи сопствените акции од Сбербанк, по што Вујновац формално би станал нејзин најголем сопственик.
Унгарската компанија „Индотек“ и домашни пензиски фондови се јавија како потенцијални сопственици на акциите на Сбербанк, но и двете планирани трансакции пропаднаа.
Трки со камили и соколарство
Меѓу штурите информации на интернет, Саиф Алкетби се споменува како долгогодишен директор на канцеларијата на принцот од Дубаи, шеикот Хамдан бин Мухамед ал Мактум. Пред да ја преземе оваа функција во 2009 година, Алкетби имал голем број позиции во дворот на владетелот на Дубаи.
Четириесет и шестгодишниот претприемач и државен службеник дипломирал сметководство во 2001 година, на Универзитетот на Обединетите Арапски Емирати, а неговите хобија вклучуваат трки со камили, патувања и соколарство. Во соопштението за печатот од канцеларијата на Алкетби се наведува и дека тој е „искусен инвеститор во приватен капитал и има значителни инвестиции во неколку сектори“, без да се прецизира за какви инвестиции станува збор.
Групацијата „Фортенова“ во првата половина од годината оствари 14 отсто повеќе приходи од лани, достигнувајќи 18,8 милијарди куни, а консолидираната оперативна добивка (EBITDA) на компанијата се зголеми за 19 отсто. Нето-добивката на групацијата во првата половина од годината, без ефект на курсни разлики, изнесува 12 милиони куни. Иако резултатот изгледа занемарливо, тој претставува подобрување во однос на загубата од 213 милиони куни од првата половина од минатата година. Компанијата сѐ уште ги нема објавено своите деветмесечни резултати.
.webp){kind=icon}
