Со новиот шести инвестициски пакет во рамките на Економскиот и инвестициски план на ЕУ за Западен Балкан, кој се очекува да изнесува 1,2 милијарда евра, се предвидени инвестиции во осум проекти за водоснабдување и канализации, третман на отпадни води, за железничкиот транспорт, како и за зелена трансформација на малите и средните претпријатија.
Од предвидените осум проекти, само оној за механизмот за иновации и зелена трансформација за поддршка на мали и средни претпријатија и нивните зелени инвестиции е на ниво на регионот на Западен Балкан и ќе биде посветен за поддршка на иновативни производи и процеси и зелени проекти, како и за ублажување на влијанието на климатските промени.
Од преостанатите инфраструктурни проекти, како што јави дописникот на МИА од Брисел, пет се во Црна Гора, а по еден во Босна и Херцеговина и во Србија.
Во Црна Гора ќе бидат поддржани проектите за изградба на системи за собирање отпадни води во Никшиќ и во Пљевља, изградба на пречистителна станица и проширување на канализациската мрежа во Улцињ, надградба на водоводниот и канализациски систем во Тиват, надградба на водоводната мрежа во Котор и поврзување на канализациските мрежи на четири населени места од оваа општина со пречистителната станица во Бока Которска, како и подобрување на системот за водоснабдување во Цетиње.
Во Босна и Херцеговина ќе се инвестира во реализација на втората програма за водоснабдување и канализации во Република Српска, а во Србија за обнова на пругата на делницата Белград-Велика Плана, во должина од 86 километри, со што ќе се овозможи движење на возовите на железничкиот коридор 10 до Ниш со брзина до 200 километри на час.
Инвестицискиот проект што ќе се реализира во соработка меѓу ЕУ, земјите од Западен Балкан и меѓународни финансиски институции вклучува 300 милиони евра грантови од Инструментот за претпристапна помош (ИПА III), дополнителни билатерални придонеси од земјите членки на ЕУ и Норвешка, кредити од меѓународни финансиски институции и средства од економиите од Западен Балканот.
Инвестицискиот пакет беше одобрен од состанокот на Оперативниот одбор на инвестициската рамка за Западен Балкан (ВБИФ) одржан во претходните два дена.
Економскиот и инвестициски план на ЕУ за Западен Балкан за периодот 2021-2027 има цел да го поттикне долгорочното заздравување на регионот, да ја забрза зелената и дигитална транзиција и да ги поттикне регионалната соработка и конвергенција со ЕУ.
Планот, кој беше усвоен од Европската комисија во октомври 2020 година, предвидува 30 милијарди евра инвестиции за период од седум години, од кои и девет милијарди евра грантови од ЕУ преку ИПА III и пет милијарди евра преку Инвестициската рамка за Западен Балкан.
Досега во рамките на економскиот и инвестициски план, ЕУ одобри програми за реализација на инвестициски проекти во износ до 17,5 милијарди евра, вклучувајќи и 5,4 милијарди евра грантови.
Инвестициската рамка за Западен Балкан (ВБИФ), пак, е заедничка финансиска платформа лансирана пред 15 години, преку која Европската комисија, финансиските институции, земјите членки на ЕУ и Норвешка ја зајакнуваат соработката во инвестиции во јавниот и приватниот сектор во регионот, за поддршка на неговиот социоекономски развој и придонес во неговата европска интеграција.
.webp){kind=icon}
