Човекот е чудно суштество, деструктивно и креативно во исто време. Додека војува за територии и ресурси на Земјата, неколку стотици илјади километри подалеку „војува“ за нови вселенски пространства. На конфликтот со Иран - да не заборавиме дека и Украина исто така мечтае за мир - сѐ уште не му се гледа крајот, иако Трамп судејќи според жестокоста на заканите кон Исламската Република, како да е при крај со трпението и нервите. Пазарите продолжуваат со нестабилноста, а новиот ултиматум на американскиот претсадетал за Иранците ги држи пазарите под уште поголем притисок.
На домашен терен почнаа ефектите од одлуките на Владата за намалување на акцизите и за повластената даночна стапка за одредени енергенти - дизелот поскапува на 98 денари, а еуросуперот БС-95 поевтинува на 83,5 денари.
Цената на дизел горивото за помалку од месец и половина порасна од 71 денари на литар на 98 денари, што е значително поскапување коешто ќе го почувствуваат семејствата кои имаат автомобили со дизел мотори, но уште поважно компаниите кои го користат ова горива во производството и дистрибуцијата. Од сите регистрирани возила во Македонија, речиси две третини се со дизел мотори.
Добро утро, ви пишува Игор Петровски од дигиталната редакција на „Блумберг Адрија“, ова се петте вести што ги издвоивме за почеток на денот.
„Артемис II“ создаде историја – човечки екипаж отиде најдалеку во вселената досега
Екипажот на „НАСА“ (NASA) од четири астронаути веќе отпатува подалеку во вселената од кој било друг човек во историјата, додека вселенското летало на мисијата „Артемис II“ се упати кон Месечината за историско прелетување.Непосредно пред 14 часот во понеделникот по њујоршко време, капсулата „Орион“, изградена од „Локид Мартин“ (Lockheed Martin Corp.), го надмина растојанието што екипажот на „Аполо 13“ го помина во 1970 година од 248.655 милји (400.170 километри) од Земјата, соопшти „НАСА“.
Екипажот ќе направи неколкучасовен лет покрај Месечината, што ќе ги донесе најблиску што некој човек стигнал до површината на Месечината во повеќе од 50 години, достигнувајќи го своето најблиско приближување малку по 19 часот по њујоршко време во понеделникот. Астронаутите ќе направат слики од далечната страна на Месечината - глетка што никогаш не е видена од Земјата.
Војната со Иран штотуку го расипа механизмот на петродоларот
Добриот магичен круг во којшто Америка ја гарантираше стабилноста на Блискиот Исток во замена на тоа земјите од Заливот да ги претвораат своите доларски приходи во американски државни обврзници е прекинат. Оваа спрега датира од 1974 година, кога Хенри Кисинџер склучи еден од најзначајните финансиски договори во модерната историја. Саудиска Арабија требаше да ја одредува цената на својата нафта во долари, а вишоците да ги складира во американски средства - пред сè во државни обврзници. Следеа и други земји од Персискиот Залив. Во замена, Америка обезбедуваше безбедносни гаранции и стабилен глобален поредок.
Американско-израелската војна со Иран го наруши овој аранжман - на двата краја. И на страната на увозот и на страната на извозот. Магичниот круг на петродоларите бара два подвижни делови: заработени долари и инвестирани долари. И двата се запрени.
Колку „боли“ цената на дизелот во Македонија?
Нафтениот шок предизвикан од воените дејствија на Блискиот Исток и затворањето на Ормускиот Теснец продолжува да ја тресе глобалната економија и да ги зголемува стравувањата од забрзување на инфлацијата.
Македонија не е исклучок од светските трендови и станува јасно дека се зголемува заканата инфлаторен вител да ја зафати земјава по вчерашната одлука на Регулаторната комисија за енергетика за промена на цените на нафтените деривати со која цената на дизелот беше зголемена на 98 денари за литар, иако претходно Владата интервенираше преку намалување на акцизите и ДДВ-то за нафтените деривати. Причината е едноставна - дизелот доминира како гориво во Македонија.
Жедта на алгоритмите - зошто водата станува „нова нафта“ за опстанок на вештачката интелигенција
Дали мислевте дека само живите суштества имаат потреба од вода за да преживеат? Грешите. Најголемите вештачки системи денес имаат потреба од вода повеќе од кога било, и во количества што просечниот човек тешко може да ги замисли. Еден од ентитетите што денес „пијат“ најмногу вода на планетата е токму оној што нема тело - вештачката интелигенција (ВИ). Она што некогаш беше нафтата за индустриската револуција сега е водата за дигиталната револуција.
Додека инвеститорите се борат кој ќе го има побрзиот чип, паметните пари полека се фокусираат на цевките. Без ладење, најмоќните графички процесори се претвораат во обичен куп стопен силициум за помалку од неколку секунди. ВИ, покрај големото количество електрична енергија, користи и големо количество течност, а во таа равенка водата станува невидлива, но апсолутно клучна инфраструктура без која целиот наратив за ВИ тешко може да преживее на високо ниво. Затоа најголемите инвестициски можности не нужно лежат само во софтверот или чиповите, туку и во физичката инфраструктура што овозможува нивно работење.
Како библиотекарите го менуваат бизнисот?
Во ерата на алгоритми и вештачка интелигенција, една професија бележи неочекуван раст. Компаниите наеднаш почнаа значајно да инвестираат во искусни корпоративни библиотекари, а платите за овие работници често достигнуваат 123.000 долари годишно, според податоците на платформата за вработување „Гласдор“ (Glassdoor).
Станува збор за висококвалификувани информатички професионалци што работат за адвокатски фирми, медицински компании и големи корпорации. Овие експерти управуваат со вредни бази на податоци, спроведуваат клучни истражувања и се одговорни за тоа носителите на одлуки да имаат точни информации кога им се потребни. Во Македонија оваа професија сѐ уште не е јасно дефинирана. Во компаниите постојат „скриени“ професионалци што управуваат со информации, но без заслужениот статус и соодветно признание.
.webp){kind=icon}
