Предлогот на Фискалниот совет за зголемување на старосната граница за пензионирање на 67 години предизвика лавина реакции во македонската јавност. Даночните експерти кои ги консултиравме сметаат дека тоа е лоша опција којашто нема да ги намали дефицитите во Фондот за ПИОМ. Според нив, има поинакви решенија за подобрување на состојбата во пензискиот систем, а едно од нив е справувањето со сивата економија.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Парите за боледувања се‘ потешки за македонската економија
Норвешка, Франција, Германија, Велика Британија - заедничко за сите земји е дека бројот на боледувања никогаш не бил повисок. Најмногу боледувања има во Норвешка, таму отсуствата се на највисоко ниво во последните 15 години. За бизнисите во Норвешка, болеста на вработените станува сè поголем проблем. Работниците земаат повеќе боледувања отколку каде било во Европа, а отсуствата се на највисоко ниво во последните 15 години. Велика Британија се соочува со финансиски загуби од 33 милијарди фунти поради долгорочни боледувања.
Од 2020 година досега бројот на економски неактивни луѓе во земјата се зголеми за речиси 800.000. Слични драматични бројки се појавија и на други места во Европа. Работодавците во Германија минатата година потрошија рекордни 77 милијарди евра (81 милијарда долари) за боледувања на вработените, повеќе од двојно од нивото во 2010 година, соопшти економскиот истражувачки институт ИВ (IW). Македонија се соочува со истиот проблем. Годишните извештаи на Фондот за здравствено осигурување (ФЗО) покажува дека бројот на лица кои користат боледувања расте.
Шест региони во Македонија полека умираат
Во шест региони во Македонија, како резултат на неповолната старосна структура и нискиот фертилитет, бројот на умрените го надминува бројот на родените. Всушност, податоците на Државниот завод за статистика откриваат дека Скопскиот и Полошкиот се единствените региони каде бројот на родените на илјада жители е се‘ уште поголем од бројот на умрените. Демографските показатели на регионално ниво покажуваат разлики што укажуваат на диспропорции во територијалната дистрибуција на населението и на други разлики. Најгусто населен е Скопскиот, a најретко населен е Вардарскиот Регион.
Забележително е и дека во повеќето региони бројот на женската популација е поголем од бројот на мажите, што особено се истакнува во Скопскиот регион. Разликите се евидентни и во старосната структура на населението. Најголемо учество на младото население (0-14 години) има во Полошкиот и во Скопскиот Регион, а најмало во Источниот Регион. Учеството на старото население (65+) е најголемо во Полошкиот и во Скопскиот Регион, а најмало во Источниот Регион. Показателите за просечната старост на населението ја потврдуваат ваквата констатација.
Еден месец по изборите: Жешки акции во вториот мандат на Трамп
Финансиските пазари се радуваа на реизборот на републиканецот Доналд Трамп за 47. претседател на Соединетите Американски Држави. Потврдата на новиот стар жител на Белата куќа топло ја поздрави биткоинот, кој се движи под психолошката граница од сто илјади долари, доларот зајакна, а растат и приносите на обврзниците и на некои акции на „пријателите“ на Трамп. Во времето на изборот на републиканскиот кандидат за претседател на Соединетите Американски Држави, подготвивме преглед на акции што треба да се следат. Еден месец подоцна, повторно подготвуваме преглед на акциите на истите компании. Значи, што се смени и дали се остварија предвидувањата?
Го зедовме предвид шестмесечното движење на цената на избраните акции. Прво ја споменавме медиумската компанија на Трамп, „Трамп медија и технолоџи груп“ (Trump Media & Technology Group), која управува со социјалната мрежа Трут (Truth Social). Околу времето на изборите, според „Инвестопедија“, акциите на компанијата се претворија во таканаречени меме-акции, привлекувајќи инвеститори што се обложуваат на победникот од претседателските избори, што го објаснува недостигот од интерес во моментот.
Директорот на „Блекрок“ создава нова генерација на милијардери, побогати од него
Како што Лари Финк го води „Блекрок“ (BlackRock Inc.) подлабоко кон приватните пазари, тој постојано додава нови милијардери на списокот на гигантот за управување со средства - и во тој процес ги прави сите побогати. Најновото трио: Скот Капник, Скот Френч и Мајк Патерсон, основачите на ХПС (HPS Investment Partners). Понудата на „Блекрок“ од 12 милијарди долари за специјалистот за приватни кредити, објавена во вторникот, ќе им овозможи на тројцата поранешни членови на „Голдман Сакс“ (Goldman Sachs Group Inc.) комбинирано нето богатство од 8,6 милијарди долари, според индексот на милијардери на „Блумберг“.
Ова за Финк е третата аквизиција на приватниот пазар оваа година, а според индексот на богатство тој вреди 1,8 милијарди долари. „Блекркок“ во јануари објави дека ја купува инвестициската фирма ГИП (Global Infrastructure Partners) за околу 12,5 милијарди долари — зацврстувајќи го богатство од 2,3 милијарди долари за основачот Бајо Огунлеси — а кон средината на годината се согласи да ја купи фирмата за податоци за приватни пазари „Прекин“ (Preqin) во аквизиција од 2,55 милијарди фунти (3,2 милијарди долари) во готовина, обезбедувајќи околу 2 милијарди долари за основачот Марк О’Харе.
Што носи француската политичка криза за инвеститорите?
Франција ја тресе политичка криза, се очекуваше владата вчера да падне. Во светло на политичката неизвесност, проверивме што се случува на берзата и дали последните потреси можат да бидат добра можност за купување за инвеститорите. Гледајќи го индексот на француските акции CAC40, кој ги следи 40-те најголеми компании, јасно е дека годинава е доста бурна, не само на политичката туку и на берзанската сцена. Во споредба со референтниот индекс на германските акции, француските акции заостануваат најмногу во последните 31 година, а политичките потреси во Париз укажуваат на понатамошно опаѓање на вредноста.
Вредноста на францускиот индекс годинава е намалена за три проценти, додека германскиот DAX без вклучени дивиденди се зголеми за 16 проценти. Дури и во последната недела, кога политичката напнатост е на врвот, вредноста на индексот CAC 40 падна за околу 0,3 проценти, додека вредноста на германскиот индекс DAX во истиот период се зголеми за 2,7 проценти, според Нико Маричиќ од „Интеркапитал“ (InterCapital).
.webp){kind=icon}
