Турскиот суд одреди притвор за Екрем Имамоглу, главниот противник на претседателот Реџеп Таип Ердоган. Имамоглу беше приведен во средата под обвинение за корупција и помагање на терористичка група, а неговото приведување предизвика масовни протести во градовите низ земјата. Стотици демонстранти се уапсени.
Добро утро, ова се останатите пет вести кои треба да ги знаете за почеток на денот.
Што би се случило со вашите 1.000 евра доколку сте ги ставеле во домашен инвестициски фонд пред 15 години?
Македонскиот берзански индекс МБИ10, како што знаеме, беше регионален шампион минатата, 2024 година, со принос од 65 проценти, со што влезе и меѓу индексите што на светско ниво најмногу пораснаа за 12 месеци. МБИ10 по големиот пад во 2008 и 2009 година, кога загуби практично 80 проценти од својата вредност, кон крајот на 2024 година повторно се врати на својот историски рекорд од 10.000 поени.
Тоа значи дека ако сте вложиле во кошничката акции членки на индексот кога тој го достигна дното по берзанскиот бум во 2006-2007 година, кога имаше вредност од околу 2.000 поени, за петнаесетина години вашите пари би се оплодиле петкратно или 400 проценти пораст.
Дали воопшто е можна глобализација
Некогаш беше распространето мислењето дека трендовите на глобализацијата се нешто неизбежно, исто како и времето. „Глобализацијата не е нешто што може да го запреме или исклучиме: таа е економски еквивалент на силата на природата, како ветерот или водата“, рече американскиот претседател Бил Клинтон за време на говорот во Ханој во 2000 година.
Неговиот британски колега, премиерот Тони Блер, се согласи со тоа на конференцијата на Лабуристичката партија во 2005 година. „Слушам луѓе што велат дека треба да застанеме и да водиме дебата за глобализацијата. Тоа е како да се дебатира дали есента треба да следува по летото. Во Кина и во Индија не разговараат за тоа. Тие ги користат можностите што ги носи глобализацијата на начини што ќе ги променат нивните животи, а исто така и нашите“.
Дали Трамп подготвува уште поселективен пристап? Белата куќа очекува царини од трилиони долари
Претстојниот бран царини на Доналд Трамп ќе биде поселективен (таргетиран) од заканите што тој повремено ги упатува, велат советниците и сојузниците. Ова може да биде олеснување за пазарите кои се под стрес поради стравувањата од општите трговски тарифи.
Трамп подготвува тарифна објава за „Денот на ослободувањето“ на 2 април (како што тој го нарекува), кога ќе ги открие таканаречените реципрочни царини што ги гледа како одмазда за царините и другите бариери кои доаѓаат од други земји, вклучително и долгогодишните сојузници на САД.
Трамп: Никој не можеше да го запре Путин, се надевам јас ќе можам
Американскиот претседател Доналд Трамп изјави дека напорите да се запре понатамошната ескалација на војната меѓу Русија и Украина се „под контрола“.
Трамп ги наведе неговите „добри“ односи со рускиот колега Владимир Путин и украинскиот претседател Володимир Зеленски како клучни за преговорите за ставање крај на војната. Тој зборуваше во интервју за „Ауткик“, веб-страница која комбинира спортски разговори со конзервативна политика и е во сопственост на корпорацијата „Фокс“.
Училишта, градинки, станбени згради – инспекторите тргнуваат во детални контроли
Во голем број од општините детално се проверуваат училиштата, градинките, спортските сали, културните домови, угостителски објекти и други места каде секојдневно се собираат граѓаните. Ваквите контроли се координирани преку Заедницата на единиците на локалната самоуправа (ЗЕЛС)
Претседателот на ЗЕЛС, Орце Ѓорѓиевски вели дека посебен акцент е ставен на објектите во кои престојуваат деца и млади, а контролите ќе продолжат и во наредните недели и месеци. Контролите почнаа по несреќата во Кочани во која во пожар настрадаа 59 млади лица, а дел од проверките ќе бидат и станбените згради.
.webp){kind=icon}
