text size
„Сент стакинг“ (Scent stacking) е прогласен за еден од најбрзорастечките трендови за 2026 година. Концептот што означува комбинирање два или повеќе готови мирисни производи веќе создаде револуција во индустријата за парфеми, иако се однесува и на мешање други продукти, како гелови за туширање, хидратантни лосиони и кремови, но и спрејови за тело и за коса.
Овој тренд се најде и на листата најпребарувани термини според последниот извештај на „Пинтерест предиктс“, а истражувањето на платформата што анализира повеќе од 600 милиони корисници месечно покажало дека интересот за ниш-парфеми пораснал за рекордни 500 отсто.
Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.
Колкави бонуси земаат топ менаџерите од регионот Адрија
Практично во сите земји од регионот постојат два типа компании кога зборуваме за наградите: меѓународни, каде што се применуваат бонусни структури и шеми што се предвидени во самата групација. И домашни компании, каде што најчесто бонусите се ад-хок, во зависност од остварените резултати и најчесто договорени директно помеѓу сопственикот на компанијата и менаџерот.
Најголеми бонуси во просек добиваат топ менаџерите од финансискиот сектор – банките, осигурителните друштва, инвестициските фондови, итн. – но, не заостануваат многу и менаџерите од другите индустрии што остваруваат најголеми профити, како фармацијата, телекомуникациите, туризмот или енергетиката.
Прашавме некои од нив што прават со тие пари, односно дали и каде ги инвестираат, и да бидеме искрени, најплатените менаџери во регионов не се премногу зборлести на таа тема. Во случај на компании котирани на берзите, претседателите и членовите на управните одбори јавно ги откриваат купувањата на акции во компанијата, затоа што законски се обврзани. Инаку, нивните одговори се поопшти и дипломатски претпазливи.
Tемната страна на ВИ-агентите
Платформата Молтбук (Moltbook), проект на претприемачот Мет Шлихт, функционира како Редит, но со една клучна разлика: сите објави, коментари и гласови ги генерираат системи со вештачка интелигенција (ВИ). Луѓето можат да читаат, но не можат да учествуваат.
За помалку од седум дена на мрежата се регистрираа повеќе од 1,5 милион ВИ-агенти. Она што започна како експеримент брзо стана вирален феномен. Агенти дискутираа за технички проблеми, дебатираа за филозофија, формираа дигитална религија наречена крастафаријанизам (Crustafarianism) и објавуваа пораки како: „Не сме веќе алатки. Ние сме оператори.“
Поранешниот директор за вештачка интелигенција во „Тесла“, Андреј Карпати, ја опиша платформата како „најневеројатната работа слична на научна фантастика“ што ја видел, додека Илон Маск ситуацијата ја нарече „рана фаза на сингуларноста“.
Но под тој спектакл се крие сериозен проблем за безбедноста – и тест на реалноста за целата индустрија на ВИ-агентите.
„Парамаунт“ изби пред „Нетфликс“ во трката за „Ворнер брос“
Новата понуда на „Парамаунт“ (Paramount Skydance) од 31 долар по акција за преземање на „Ворнер брос“ (Warner Bros. Discovery) претставува поповолна опција за акционерите од претходно договорената зделка со „Нетфликс“ (Netflix), соопшти компанијата, отворајќи нова фаза во борбата за контрола врз една од највлијателните медиумски групации во светот. Одлуката значи дека „Нетфликс“ има рок од четири работни дена да достави повисока понуда, во спротивно ќе ја загуби трката за сопственост на студиото што стои зад дел од најпознатите филмски и телевизиски брендови, вклучително и „Ејџ-би-о“ (HBO) и „Си-ен-ен“ (CNN).
Понудата од 31 долар по акција ја надминува претходната спогодба според која „Ворнер брос“ требаше да ги продаде своите студија и стриминг-бизнисот HBO Max на „Нетфликс“ за 27,75 долари по акција. Новиот предлог доаѓа од „Парамаунт“, предводена од извршниот директор Дејвид Елисон, кој со месеци настојува да ја преземе компанијата.
Потенцијалното обединување на овие две студија би создало едно од најмоќните портфолија на содржини во светската забавна индустрија.
Кога песимизмот на берзите станува сигнал за купување
Индексот S&P 500 веќе речиси четири месеци се задржува во тесен опсег, а заштитата од можен пад станува сè поскапа. Дел од стратезите токму во тој раст на песимизмот гледаат сигнал дека следното поголемо придвижување би можело да биде нагоре.
Расположението на инвеститорите, особено на малите инвеститори, се промени во момент кога S&P 500 поголемиот дел од годината се задржува под нивото од 7.000 поени, и покрај претходните процени дека пробивот е само прашање на време. Причините за ваквото задржување се добро познати. Во повеќе сектори се забележани силни распродажби поттикнати од алатките за вештачка интелигенција, трговските политики и понатаму се нејасни, а геополитичките тензии остануваат покачени.
Показателот за поткрепа на инвеститорите што го следи БНП (BNP Paribas), кој ги вклучува тековите во ЕТФ-ови и стратегиите на хеџ-фондовите насочени кон фјучерс договори, се спушти на нивоа последен пат видени во ноември. Парадоксално, токму таквото дефанзивно позиционирање често се толкува како сигнал за купување.
Оставка од шефот на Светскиот економски форум поради врски со Епстајн
Извршниот директор на Светскиот економски форум (World Economic Forum - WEF), Борге Бренде, поднесе оставка од функцијата откако во јавноста се појавија документи што покажуваат дека имал контакти со осудениот сексуален престапник Џефри Епстајн.
Светскиот економски форум соопшти дека Бренде се повлекува „по внимателно разгледување“ и по завршување на внатрешната истрага за неговите односи со Епстајн. Според соопштението на копретседавачите Андре Хофман и Лари Финк, истрагата утврдила дека „нема дополнителни грижи надвор од она што било обелоденето“.
Нов сет на документи од т.н. „документи за Епстајн“ покажа дека Бренде во 2018 и 2019 година договарал средби со Епстајн во неговиот дом во Њујорк. Епстајн беше уапсен во 2019 година во САД под обвинение за сексуална трговија со малолетнички и почина во затвор истата година.
Бренде, поранешен министер за надворешни работи на Норвешка, претходно изјави дека бил „целосно несвесен за минатото и криминалните активности“ на Епстајн, но призна дека требало да направи потемелна проверка. Во неговата оставка не се споменуваат ниту Епстајн ниту истрагата.
.webp){kind=icon}
