Британскиот министер за финансии, Џереми Хант најави пакет од 55 милијарди фунти (65 милијарди долари) за зголемување на даноците и намалување на трошоците за Обединетото Кралство со цел да се покрие финансиската дупка на земјата и да се врати довербата меѓу инвеститорите.
Хант објави повисоки даноци на платите и дивидендите за богатите и го продолжи данокот на нафтените и гасните компании, велејќи пред претставниците од Долниот дом дека им дава приоритет на „стабилноста, растот и јавните услуги“.
„Преземаме тешки одлуки за да се справиме со инфлацијата и да ги задржиме хипотекарните камати ниски“, им рече Хант на пратениците за време на неговата есенска изјава. „Нашиот план води до поплиток пад; пониски сметки за енергија; повисок долгорочен раст и посилно здравство и образовен систем“.
Владата на премиерот Риши Сунак ги наметнива мерките со цел враќање на довербата кај инвеститорите во способноста на Британија да исплива на површина, по катастрофалниот експеримент со длабоки даночни намалувања од страна на неговата претходничка, Лиз Трас.
Во продолжение, ова се мерките кои денеска ги најави Хант:
- Прагот при кој се наплаќа даночна стапка од 45 отсто е намален на 125.140 фунти од 150.000 фунти;
- Другите прагови за данок на доход и оние за национално осигурување и данок на наследство се замрзнати за дополнителни две години, до април 2028 година;
- Неочекуваниот данок за нафтените и гасните компании е зголемен на 35 отсто од 25 отсто и е поставен нов данок од 45 отсто за производителите на електрична енергија;
- Олеснувањето на данокот на капитална добивка е повеќе од преполовено на 6.000 фунти следната година, а ќе биде повторно преполовено на 3.000 фунти од април 2024 година;
- Олеснувањето на данокот за приход од дивиденда е преполовено на 1.000 фунти следната година и повторно на 500 фунти во годината по неа;
- Буџетот за странска помош останува замрзнат на 0,5 отсто од БДП најмалку до април 2028 година; Сунак претходно вети дека ќе го врати на 0,7 отсто во 2024-2025 година;
- Замрзнување на прагот на приходи при кои бизнисите мора да се регистрираат за да плаќаат данок на додадена вредност до март 2026 година;
- Исплатите на социјална помош и пензии ќе се зголемат во согласност со инфлацијата;
- Едногодишно продолжување на ограничувањето на сметките за енергија после април, но на 3.000 фунти наместо 2.500 фунти;
- Исплати од 900 фунти за ублажување на трошоците за живот на домаќинствата, 300 фунти за пензионерите и 150 фунти за оние кои добиваат бенефиции за попреченост;
- Зелено светло за изградба на нуклеарната централа Sizewell C;
- Електричните автомобили oд 2025 година веќе нема да бидат ослободени од акцизи за возила;
- 600.000 луѓе на универзални бенефиции ќе мора да контактираат со советници за работа, во обид да се намали бројот на луѓе кои се надвор од пазарот на трудот;
- Зголемување на националната плата од 9,7 отсто, најголемо досега;
- Задржување на надлежноста на Банката на Англија, со нагласување дека Министерството за финансии ќе работи со централната банка за да ја спречи инфлацијата.
Министерот рече дека целта на неговата програма е долгот да падне до 2027-2028 година, а задолжувањето на јавниот сектор во следните пет години да биде под три отсто од БДП.
Задачата е огромна бидејќи треба да се поправи економската штета предизвикана од пандемијата Ковид-19, последиците од војната на Русија во Украина и катастрофалниот мандат на претходничката на Сунак, Лиз Трас и нејзиниот министер, Кваси Квартенг, чија масовна програма за нефинансирани даночни кратења ја потонаа фунтата и ги разбранува пазарите на обврзници.
.webp){kind=icon}
Во моментов нема коментари за веста. Биди прв да коментира...