.webp){kind=icon}
Проблемите со менталното здравје ги држат британските работници надвор од работните места во време кога на економијата и се најпотребни.
Во услови на мрачна економска перспектива, пад на реалните плати и криза во Национална здравствена служба, има се повеќе докази дека младите работоспособни луѓе во земјата страдаат од долгорочни здравствени проблеми што ги држат без работа се подолго време.
Забележан е раст од 29 отсто кај лицата на возраст од 16 до 24 години кои како причина за економската неактивност наведуваат долготрајна болест. Кај лицата на возраст од 25 до 34 години растот изнесува 42 отсто, покажуваат статистичките податоци. Податоците се за вториот квартал од 2022 година во споредба со истиот период пред пандемијата.
Не се само младите. Според владините податоци, стресот поврзан со работата е пријавен како најголем двигател на неактивност кај луѓето на возраст од 50 до 54 години. Севкупно, проблемите со менталното здравје опфаќаат вкупно околу 600.000 економски неактивни луѓе од сите возрасни групи што е зголемување од 10 отсто во однос на бројките пред пандемијата.
Со оглед на силната врска помеѓу нарушувањата на менталното здравје и невработеноста, порастот на бројот на неактивни млади во Британија има директни економски последици. Ова ја поттикнува конкуренцијата меѓу фирмите во однос на платите, додавајќи притисок врз инфлацијата, која веќе е близу до највисокото ниво во последните четири децении.
Податоците укажуваат и на загрижувачки пад на целокупното здравје на нацијата, при што најмладите работници се соочуваат со рецесијата, а платите не успеваат да држат чекор со двоцифрената инфлација.
Хронични проблеми
Ова не е само феномен по пандемијата - експертите велат дека трендот постои цела деценија. Луиз Марфи, економист во Фондацијата „Резолушн “, вели дека здравјето на помладата генерација веќе се влошувало „прилично драматично“ пред пандемијата. Но, проблемот станал поакутен по Ковид.
„Нема сомнеж дека Ковид ги забрза проблемите со менталното здравје во оваа возрасна група“, вели Мајори Валас, извршна директорка на добротворна организација за ментално здравје. „Тие не одеа на училиште, беа изложени на домашна атмосфера и поминуваа повеќе време на социјалните мрежи“.
Податоците на Националната здравствена служба покажуваат дека секој четврти млад човек на возраст од 17 до 19 години во Англија веројатно имал ментално растројство во 2022 година, за разлика од еден од шест претходната година.
Едно недоманешно истражување покажа дека проблемите со менталното здравје се најчестите состојби кај оние кои се надвор од пазарот на труд поради долготрајно боледување. Декемврискиот извештај, исто така, покажа дека 20-29-годишниците кои не работат поради болест имаат 50 отсто поголема веројатност да пријават проблем со менталното здравје отколку постарите работоспособни.
Проблемот е особено изразен кај мажите, велат од фондацијата „Резолушн“. Бројот на неактивни мажи со проблеми со менталното здравје се искачи на 37.000 во 2021 година, што е зголемување од 103 отсто во однос на бројките од 2006 година и значително повисоко од нивото забележано кај жените.
Зошто сега?
Истражувањата укажуваат дека недоволното работење на Националната здравствена служа е клучен фактор за полошото здравје на нацијата, вклучително и нарушувања на менталното здравје, и додаваат дека долгото траење на пандемијата веројатно го влоши проблемот.
Податоците од Империал колеџот во Лондон покажуваат дека бројот на прегледи кај општите лекари на луѓето на возраст меѓу 15 и 24 години паднал за 31 отсто за време на првиот карантин во 2020 година во споредба со претходните години. Ова може да укаже на потенцијално зголемување на недијагностицираните проблеми.
„Не е изненадување што гледаме дека менталното здравје на населението е во криза“, вели Крис Томас, шеф на Комисијата за здравје и просперитет. „Пристапот до услугите постојано се влошуваше. Комбинацијата на Ковид-19 и кризата со инфлацијата зема голем данок. Се соочуваме со рецесија на менталното здравје“.
Валас додаде дека менталното здравје било запоставено во Обединетото Кралство, поради тоа што системот е недоволно подготвен за да се справи проблемите на младите луѓе во изминатата деценија.
„Има се помалку психијатриски кревети - изгубивме 60.000 во изминатите 30 години“, вели Валас. „Многу луѓе сега мора да се потпрат на грижата од заедницата, што се покажува како помалку ефикасно бидејќи нивните тимови често се многу намалени“.
Се разбира, во игра се и причинските фактори. Улогата на социјалните медиуми во поттикнувањето на проблемите со менталното здравје кај младите е добро документирана, а Валас додава дека веројатно ја игра најголемата улога во влошувањето на сликата кај помладата генерација.
Но, податоците покажуваат дека менталното здравје има и социо-економски врски. Податоците покажуваат дека децата во домаќинствата со финансиски тешкотии се особено ранливи на анксиозност и стрес, што укажува на тоа дека во услови на еден од најлошите притисоци врз приходите на домаќинствата, проблемот може да се влоши.
„Општата клима во моментот со кризата на инфлацијата, конфликтот во Украина, политичката неизвесност - сето тоа е прилично дестабилизирачко за еден млад човек“, вели Џош Најт, виш службеник за политика за вработување на младите во земјата.
