.webp){kind=icon}
Голем дел од канцеларискиот персонал беше принуден денеска да работи од дома, бидејќи широкораспространетата индустриска акција ги затвори училиштата и ја онеспособи британската железничка мрежа, додека стотици членови на вооружените сили беа повикани да ги покријат штрајковите.
Штрајкуваат околу 475.000 члена на синдикатите, барајќи зголемување на платите, што ќе придонесе во нивната борба против кризата со трошоците за живот. Многумина минатата година добија зголемување на платите за помалку од пет проценти, иако инфлацијата се искачи над 10 отсто.
„Сакаме да имаме дополнителни разговори со синдикатите. Некои од тие дискусии беа конструктивни. Владата ќе продолжи да презема одговорни активности за да се осигури дека работниците во јавниот сектор се фер платени, но и дека тоа е прифатливо за даночниот обврзник“, рече денеска портпаролот на премиерот Риши Сунак, Макс Блејн. „Јавноста треба да биде подготвена за прекин или пречки во работата на аеродромите и пристаништата“, рече тој.
Владата обезбеди 600 вооружени сили и околу 180 државни службеници, бидејќи службениците на граничните сили се меѓу вработените во јавниот сектор што штрајкуваат. Одделот за образование во соопштението рече дека околу 9,3 проценти од училиштата се целосно затворени, а други 44,7 отсто се отворени, но со ограничен пристап.
Bloomberg Mercury
Главните железнички станици во Лондон се целосно затворени, вклучувајќи ги Викторија, Кенон стрит, Мерилбоун и Лондон бриџ, додека повеќе од десетина клучни патнички железнички линии воопшто не сообраќаат. Сепак, имаше добри вести за патниците, бидејќи синдикатот РМТ (RMT) рече дека ќе ја разгледа новата понуда од „Нетворк реил“ (Network Rail). Во моментов размислува за посебна понуда од британските железнички компании, кои веќе предложија договор со ТССА (TSSA), уште една голема работничка организација.
Денешниот штрајк е последица од напуштањето на возачите што му припаѓаат на синдикатот „Аслеф“ (Aslef), за кој се очекува да издржи подолго во име на подарежливо зголемување на платите. Мик Линч, генералниот секретар на РМТ, за време на протестот рече дека бранот на индустриските акции започна уште летово со работниците во железницата, а денеска го достигна врвот.
Националниот синдикат за образование проценува дека околу 85 проценти од училиштата во Англија и Велс се затворени или делумно затворени. Но секретарката за образование Џилијан Киган утрово изјави дека повеќето училишта се отворени, а попрецизни бројки ќе бидат објавени подоцна денеска.
Денот на координирана индустриска акција веројатно ќе биде најтешкиот ден на штрајкови во Британија во повеќе од една деценија, натрупувајќи притисок врз конзервативната администрација на Сунак да ги реши споровите со вработените во јавниот сектор со дарежливи понуди за плата. Машиновозачите, наставниците, универзитетскиот персонал и државните службеници, сите заедно протестираат.
Според процените на „Блумберг економикс“, масовните штрајкови од ланското последно тримесечје може да ја чинат Велика Британија околу 1,5 милијарда фунти (1,85 милијарда долари), при што се очекува економијата да се уназади во првите три месеци од 2023 година. Дури и британскиот регулатор на пазарот е во средина на битката за плати. Истражувањето спроведено меѓу 500 вработени во Управата за финансиско однесување во јануари покажа дека повеќе од половина од вработените во регулаторот размислуваат да ги напуштат своите работни места како резултат на неодамнешниот договор за плати, се вели во денешното соопштение за печатот од синдикатот „Јунајт“ (Unite). Во изминатата година вработените таму штрајкуваа, додека главниот извршен директор Нихил Рати се насочува кон реформи во структурата на платите.
