Продажбата на автомобили во Европа расте веќе шести месец по ред, предводена од силниот раст во Шпанија и Италија, бидејќи проблемите со синџирите за снабдувањето се олеснуваат и ги поттикнуваат надежите за закрепнување по пандемијата.
Регистрациите на нови автомобили скокнаа за 11 проценти, на 911.064 возила минатиот месец, објави утрово Европската асоцијација на производители на автомобили. Додека недостигот од полупроводници и други компоненти се намалува, производителите на автомобили сега се борат со инфлацијата и забавувањето на економиите.
„Западноевропските земји се соочуваат со рецесиски услови, со повисоки цени и каматни стапки што го притискаат реалниот приход на домаќинствата“, се вели во овомесечниот извештај на „ЛМЦ аутомотив“ (LMC Automotive). Иако ја очекуваат првата годишна добивка во регионалната продажба на автомобили оваа година, сепак нивната проекција за 10,95 милиони испораки е многу пониска од 14,3 милиони, колку што беше во 2019 година. Полните книги со нарачки им даваат на компаниите простор за дишење за да се справат со тешките економски услови.
Движење на регистрацијата на нови возила во Европа (изразено во проценти) / Bloomberg Mercury
По три години опаѓање на продажбата, испораките оваа година би можеле да пораснат од пет до 10 проценти, сметаат Џилијан Дејвис и Мајкл Дин од „Блумберг интелиџенс“ (Bloomberg Intelligence).
„Неизвесната економска заднина веројатно нема да се претвори во пад во 2023 година, имајќи предвид дека обемот на набавка во 2022 година се совпаѓа со претходните ниски нивоа во време на европски рецесии“, велат аналитичарите во својата белешка.
Добивките од минатиот месец беа особено изразени во Шпанија и Италија, каде што продажбата се зголеми за 51 отсто, односно за 19 проценти. Регистрациите во Германија паднаа за 2,6 проценти откако законските измени ја намалија продажбата до декември, забележува „ЛМЦ аутомотив“.
„Фолксваген“ (Volkswagen AG) и „Рено“ (Renault SA) предвидуваат дека ќе ја зголемат продажбата благодарение на големите нарачки и новите модели што привлекуваат купувачи. Францускиот производител го предводеше растот меѓу големите европски производители на автомобили со скок од 24 проценти во јануари.
„Тесла“ (Tesla Inc), која започна со производство во својата германска фабрика минатиот март, ја зголеми продажбата за повеќе од 11 пати, на 9.469 возила минатиот месец, победувајќи ги брендовите како „Порше“ (Porsche) и „Ленд ровер“ (Land Rover).
Продадени возила според производители / Bloomberg Mercury
Иако потрошувачите и натаму остануваат притиснати од високата инфлација, изгледите за некои земји се подобруваат. Германската централна банка сега вели дека германската економија може да се намали само малку во 2023 година, а Европската комисија минатата недела дури предвиде дека најголемата економија во регионот ќе оствари раст од 0,2 отсто, иако Европската централна банка сигнализира дополнително зголемување на каматните стапки.
.webp){kind=icon}
Во моментов нема коментари за веста. Биди прв да коментира...