.webp){kind=icon}
Турската инфлација забави на најниско ниво во една година, иако државните трошоци по разорните земјотреси и полабавата монетарна политика може сè повеќе да претставуваат ризик за цените.
Потрошувачките цени минатиот месец се зголемија за 55,2 проценти на годишно ниво, во споредба со 57,7 отсто, колку што беа во јануари, според податоците објавени во петокот. Просечната прогноза во истражувањето на „Блумберг“, спроведено меѓу економистите, беше 55,7 отсто.
Инфлацијата во Турција забавува во последните четири месеци, откако претходно се искачи на 85 проценти, што беше највисокото ниво од 1998 година. Позначајниот пад во голем дел е резултат на статистичките ефекти, бидејќи валутната криза во 2021 година, која ги поттикна цените во спиралата на раст, создаде висока основа за споредба. Но цените сега се ладат со многу побавно темпо, при што последиците од катастрофата дополнително ги вознемируваат изгледите додека монетарната политика останува исклучително лабава.
Владата планира стимулативна програма за надоместување на економската штета од земјотресите што се случија на 6 февруари, во кои загинаа околу 50.000 луѓе, а илјадници згради се уништени. Околу 5,3 милијарди долари се доделени за хуманитарни акции заедно со паричните средства за семејствата.
„Основните ценовни притисоци во Турција остануваат загрижувачки и веројатно се влошија поради земјотресот. И покрај тоа што очекуваме исклучително високите базни ефекти да ја намалат инфлацијата понатаму, веруваме дека темпото на овој пад ќе биде побавно од претходно очекуваното“, велат аналитичарите на Голдман Сакс (Goldman Sachs Group Inc), предводени од Кевин Дејли, во извештајот пред објавувањето на податоците.
Пркосејќи ѝ на економската политика низ светот, претседателот Реџеп Таип Ердоган веќе му даваше приоритет на монетарниот стимул пред земјотресите за да ја зајакне поддршката од гласачите пред изборите во мај. Минималната плата на почетокот на годината беше зголемена за над 50 проценти, а оваа недела парламентот го одобри нацрт-законот со кој се одобрува предвремено пензионирање за над два милиона луѓе, одлука што може да чини 13,2 милијарди долари.
По катастрофата, фокусот на задржување на евтините пари во економијата е уште поголем. Централната банка минатиот месец ја намали основната каматна стапка за 50 базични поени на 8,5 отсто, делумно како одговор на природната катастрофа.
Ердоган вети брза изградба на погодената област, која чини околу 10 отсто од бруто-домашниот производ на земјата.
