Народната банка на Швајцарија - СНБ (Swiss National Bank) ја зголеми каматната стапка за 50 базични поени и сигнализираше дека ќе дојде до уште повеќе зголемувања, бидејќи ја продолжува борбата со инфлацијата само неколку дена откако падот на втората по големина банка во земјата стана епицентар на глобалните финансиски превирања.
Официјалните лица ја покачија референтната вредност на 1,5 отсто, исход што го предвидуваа поголемиот број економисти пред принудното преземање на „Кредит Суис“ (Credit Suisse Group AG) од поголемиот конкурент УБС (UBS Group AG) да ги замати изгледите со пазарни турбуленции претходно оваа недела.
„Не може да се исклучи дека можноста за дополнително зголемување на основната стапка на СНБ ќе биде неопходно за да се обезбеди стабилност на цените на среден рок. За да обезбедат соодветни монетарни услови, СНБ исто така останува подготвена да биде активна на девизниот пазар“, рече Томас Џордан, претседател на СНБ, додавајќи дека продажбата на валути била во фокусот.
Кварталната објава денеска од страна на швајцарските креатори на политиката се совпаѓа со таа на Европската централна банка (ЕЦБ), која минатата недела ги покачи каматните стапки за истиот износ и следува по вчерашниот потег на Федералните резерви (ФЕД) од зголемување за четвртина процент.
Продолжувајќи со голем чекор, СНБ сигнализираше дека нејзиниот аларм за инфлацијата ја надминува секоја загриженост по реакцијата на пазарот на швајцарскиот договор во неделата, што предизвика заострување на финансиските услови за банките низ Европа. Официјалните лица навистина признаа дека превирањата го одвлекувале вниманието.
„Банкротот на 'Кредит Суис' би имал сериозни последици за националната и меѓународната финансиска стабилност и за швајцарската економија. Преземањето на овој ризик би било неодговорно“, рече Џордан.
Додека растот на потрошувачките цени во Швајцарија е помал од половина од околните земји од еврозоната и е низок според меѓународните стандарди, неочекуваното забрзување во февруари и грижите за потенцијалните притисоци врз платите предизвикаа зголемена загриженост кај официјалните лица. Овој потег ѝ овозможува на Швајцарија делумно да ја намали разликата со повисоките стапки на ЕЦБ и ФЕД, чии креатори на политики двојно почесто носат одлуки за текот на монетарната политика. Референтните трошоци за задолжување во Швајцарија остануваат за 150 базични поени пониски отколку во еврозоната.
Денешниот потег потенцијално може да помогне да се зајакне франкот наспроти увезените ценовни притисоци. Имено, по објавата на одлуката, швајцарскиот франк се сврте кон добивки во однос на еврото, зголемувајќи се за 0,2 проценти, до 0,9936 франци за евро.
Инфлација во Швајцарија / Bloomberg
СНБ проектира инфлација од 2,6 проценти во 2023 година, со цел да се забави на два отсто во следните две години.
Откако неочекувано не успеа да расте во последниот квартал од минатата година, се смета дека Швајцарија сè уште ќе избега од рецесија. СНБ смета дека економијата оваа година веројатно ќе забележи раст од околу еден отсто, што е намалување од 2,1 проценти, колку што беше во 2022 година.
.webp){kind=icon}
