Во октомври германските бизнисмени беа малку пооптимисти за условите за бизнис, што укажува на очекувањата дека најголемата европска економија ќе закрепне. Оптимизмот дојде и покрај тоа што Германија се соочува со можна втора рецесија за нешто повеќе од 12 месеци.
Индексот на очекувања, следен од институтот „Ифо“ (Ifo), се искачи на 84,7 во октомври, од септемвриските ревидирани 83,1 поен. Тоа ја надмина просечната вредност на истражувањето на „Блумберг“ за проекциите меѓу економистите (83,5 поени). Индексот на сегашните услови неочекувано порасна.
„Она што го гледаме сугерира дека доаѓа одредена стабилизација“, изјави претседателот на институтот Клеменс Фуест за телевизијата „Блумберг“ во средата. „Германската економија ќе забележи пад оваа година, но во последниот квартал очекуваме стабилизација и благ раст“, додаде тој.
Германија не бележи раст повеќе од една година, а економистите се помалку оптимисти од Фуест, предвидувајќи пад во втората половина од годината,поради енергетската криза, слабата побарувачка од Кина и повисоките каматни стапки.
Производствениот сектор и понатаму е зафатен од проблеми. Хемискиот гигант „Ланхесс“ (Lanxess AG) минатата недела објави дека ќе отпушти седум отсто од своите работници во Германија поради недостиг на енергија и намалената побарувачка. Претходно беа најавени отпуштања во „БАСФ“ (BASF SE). Цитирајќи ги зголемените цени и прекините на синџирот на снабдување, „Фолксваген“ ги намали своите проекции.
„Позитивните показатели најмногу доаѓаат од услужниот сектор“, рече Фуест. „Тоа се сектори како што се ИТ и туризмот“, додаде тој.
Bloomberg Mercury
Истражувањата објавени во вторникот од S&P Global, исто така, не донесоа никаква удобност и покажаа намалување на активноста на приватниот сектор овој месец. Падот беше уште посериозен од септември, а знаци на слабост имаше и на пазарот на труд, кој до сега беше светла точка.
Подлабоките предизвици, како што се стареењето на германската работна сила и потребата за диверзификација на трговските односи и оддалечување од Кина, покажуваат дека Германија може да смета само на низок раст во наредните години. Се појавија и споредби со 1990-тите, кога Германија беше опишана како „болен човек“ на Европа.
Врвните функционери, вклучително и министерот за финансии Кристијан Линднер и претседателот на „Бундесбанк“ Јоаким Нагел, ја отфрлаат таквата карактеризација, додавајќи дека германската индустрија може да ги надмине предизвиците со кои се соочува.
Фуест рече дека порелаксирана монетарна политика може да и даде поттик на економијата во 2024 година. „Можеби ќе има дури и простор за намалување на каматните стапки следната година - можеби во втората половина“, рече тој пред состанокот за политика на Европската централна банка во четврток. „Сепак, јас сигурно не би ја советувал ЕЦБ да ги зголеми стапките“, заклучи тој.
.webp){kind=icon}
