Еврозоната под ризик од рецесија додека германската економија паѓа

Германското индустриско производство падна во октомври петти месец по ред, што е показател дека најголемата европска економија оди кон рецесија.

Производството падна за 0,4 отсто во однос на септември, предводено од секторот машини и опрема, соопшти во четвртокот заводот за статистика. Економистите анкетирани од „Блумберг“ прогнозираа раст од 0,2 отсто.

Исходот покажува дека Германија се бори да го одржи економскиот раст по кризата предизвикана минатата зима со скокот на цените на енергијата. Бруто-домашниот производ се намали за 0,1 отсто во кварталот што заврши во септември, а аналитичарите предвидуваат уште еден таков пад во овој квартал, што значи дека рецесијата е реална можност.

Производителите - столбот на германската економија - се особено погодени од поскапата енергија, повисоките каматни стапки и слабата глобална побарувачка. Неколку големи индустриски фирми почнаа да ги намалуваат трошоците, а производителот на хемикалии БАСФ (BASF SE) планира да ги намали инвестициите за речиси 15 отсто во следните четири години.

Податоците објавени во текот на неделава покажаа дека бројот на фабрички нарачки паднал повеќе од очекуваното, што дополнително ги намалува шансите за закрепнување. Буџетските превирања во Берлин тежат и врз изгледите на Германија.

Сепак, неодамнешните истражувања укажуваат на одредена стабилизација. Деловните изгледи на институтот „Ифо“ (Ifo) минатиот месец достигнаа највисоко ниво во последните шест месеци. Од друга страна, анкетата меѓу менаџерите за набавки истакна „значителна слабост“.

Германската индустрија не е единствената со лош почеток на четвртиот квартал. Франција и Шпанија забележаа сличен пад на почетокот на неделава, а пад се очекува и во Италија, каде што податоците ќе бидат објавени во текот на денот.

Доколку овие тенденции продолжат и се прошират во други земји, самата еврозона би можела да влезе во рецесија, бидејќи во претходниот квартал веќе беше забележан пад на економската активност.

Во моментов нема коментари за веста. Биди прв да коментира...

Остави коментар