Германија претрпе зимска рецесија во мрачниот прв квартал

Германија претрпе зимска рецесија, покажуваат новите податоци, згаснувајќи ги надежите дека најголемата европска економија може да ја избегне таквата судбина среде војната во Украина.

Производството во првиот квартал се намалило за 0,3 отсто од претходните три месеци, по падот од 0,5 отсто помеѓу октомври и декември, објави во четвртокот заводот за статистика. Неговата првична процена минатиот месец беше за стагнација.

„Воздржаноста на домаќинствата да купуваат е очигледна во повеќе области“, се наведува во соопштението. „Домаќинствата трошат помалку на храна и пијалаци, облека и обувки и на мебел“. Тие исто така купуваат помалку електрични автомобили, на што влијаат и намалените субвенции.

Исто така има пад на државните расходи, додека инвестициите се зголемени  - потпомогнати од градежништвото засилено од несвојствено топлото време.
 

Германија, сепак, претрпе зимска рецесија Bloomberg

Резултатот е назадување за Германија, која и покрај тоа што ги избегна најмрачните сценарија од кои стравуваше по руската инвазија, сепак подлегна на рецесијата што канцеларот Олаф Шолц се чинеше дека ја отфрли во јануари.

Клучниот производствен сектор исто така се покажува како проблем: продлабочувањето на падот фрла сомнеж врз закрепнувањето што многумина го очекуваат во наредните квартали.

Навистина, индустриската слабост влијае на изгледите за бизнисот. Мерачот за очекувањата на институтот „Ифо“ (Ifo) падна, додека истражувањето на лоби-групата ДИХК (DIHK) укажа на нула раст на БДП за 2023 година.

Извештајот на „Бундесбанката“ од оваа недела понуди одреден оптимизам  - сугерирајќи дека економијата може да порасне „малку“ овој квартал, бидејќи големите заостанати нарачки, олеснувањето на тесните грла за снабдување и пониските трошоци за енергија ги поддржуваат производителите.

Но побарувачката на стоки се намалува, бидејќи потрошувачите соочени со покачена инфлација претпочитаат да трошат на одмор и патувања. Тоа го прави економскиот раст сè понерамномерен  - тренд што некои аналитичари велат дека не е одржлив.

„Се чини дека оптимизмот на почетокот на годината сега отстапува место за соочување со реалноста“, вели економистот на ИНГ (ING) Карстен Брзески во белешка за клиентите. „Падот на куповната моќ и намалените индустриски нарачки, како и влијанието на најагресивното заострување на монетарната политика во последните децении и очекуваното забавување на американската економија, се во прилог на слабата економска активност“.

За економистите во „Комерцбанк“, рецесија во втората половина сега изгледа поверојатна од враќање, кое повеќето нивни колеги и натаму го прогнозираат.

Инфлацијата не помага: таа сè уште надминува 7 отсто и не се очекува брзо да се повлече, бидејќи зголемувањето на платите ги потхранува силните базични притисоци, според „Бундесбанката“.

Во моментов нема коментари за веста. Биди прв да коментира...

Остави коментар