Германската бизнис доверба падна на најлошото ниво од раните месеци на пандемијата поради зголемената загриженост дека рекордната инфлација и ограничените резерви на енергија од Русија ќе ја доведат најголемата европска економија во пад.
Мерачот на очекувањата објавен денеска од страна на Институтот Ифо (Ifo) со седиште во Минхен падна на 80,3 во јули од 85,8 во јуни. Аналитичарите предвидуваа пад до 83,0. Индексот на сегашните услови исто така е во пад.
„Германија е на работ на рецесија“, посочи претседателот на Ifo, Клеменс Фуест. „Високите цени на енергијата и заканата од недостиг на гас тежат врз економијата. Компаниите очекуваат значително полоша деловна активност во наредните месеци“, додаде тој.
Извештајот го одразува растечкото сивило во Германија, чие закрепнување од пандемијата веќе беше пригушено поради неконтролираната инфлација и недостигот на компоненти, влошени со војната во Украина. Мерачот на активноста во приватниот сектор на S&P Global сигнализираше дека економијата почна да се намалува во јули, за првпат годинава.
Bloomberg
Бундесбанката минатата недела предупреди дека растот на цените најверојатно ќе остане покачен во наредните месеци, па дури и може да го продолжи своето искачување во септември со завршување на привремените мерки за олеснување. Стравувањата за испораките на рускиот гас и натаму тежат врз изгледите за германскиот раст, се вели во месечниот извештај.
Клучен ризик за Германија, која увезува голем дел од својот природен гас од Русија, е дека понатамошното забавување или застој во снабдувањето може да ја зголеми инфлацијата.
Веќе притиснати од растот на цените, потрошувачите и компаниите сега мора да се борат со повисоки каматни стапки откако Европската централна банка ги подигна трошоците за задолжување за прв пат по повеќе од една деценија минатата недела.
Дури и по испорачаното поголемо почетно зголемување на стапката, ЕЦБ можеби нема да заврши со големи покачувања, рече во интервју членот на Управниот совет, Мартинс Казакс.
Фуест, пак, вели дека цените на енергијата ќе играат поважна улога во обликувањето на германската економија во текот на следните месеци.
.webp){kind=icon}
