Унгарија ги зголемува даноците за банките за да го полни буџетот

Унгарија објави дека ќе воведе нови даноци за банките и ги отфрли плановите за намалување на данокот на неочекувани добивки (еднократен додаток што се наплаќа на компанија или индустрија кои имаат големи и неочекувани профити) за целните индустрии, бидејќи новите податоци покажаа дека буџетскиот дефицит дополнително се зголемува.

Акциите на „ОТП Банк“ (OTP Bank Nyrt.) паднаа за дури 2,2 отсто, а форинтата се лизна за 0,4 отсто во однос на еврото, откако министерот Гергели Гуљас рече дека Унгарија ќе воведе данок на девизните тргувања на банките и ќе го зголеми данокот за трансакции.

Дефицитот се зголеми за 108 милијарди форинти на кумулативни 2,66 билиони (7,3 милијарди долари) за првите шест месеци, според податоците објавени од Министерството за финансии во понеделникот. Тоа е поголем минус од она што Владата првично го планираше за цела година.

Администрацијата, исто така, ќе ги задржи сегашните нивоа на данокот на неочекувани добивки за банките, енергетските фирми и за компаниите во странска сопственост, и покрај претходните ветувања дека ќе ги намали. Гуљас рече дека владата очекува 400 милијарди форинти од мерките објавени денеска.

Помеѓу новите мерки, Владата воведува нова давачка за девизните зделки на банките со стапка од 0,45 отсто, додека данокот на трансакциите го зголемува на истото ниво од сегашните 0,3 отсто, почнувајќи од почетокот на август.

Владата на Виктор Орбан се справува со континуираното зголемување на дефицитот оваа година, дури и откако ја зголеми целта за дефицитот на 4,5 отсто од БДП и замрзна некои инвестиции финансирани од државата претходно оваа година. Унгарија беше една од седумте земји кои ЕУ ги опомена минатиот месец поради прекумерните дефицити.

Во моментов нема коментари за веста. Биди прв да коментира...

Остави коментар