Во 2023 година, 9,5 проценти од популацијата на ЕУ не можеле да си дозволат оброк кој содржи месо, риба или еквивалент на вегетаријанска храна секој втор ден, што е за 1,2 процентни поени (п.п.) повеќе во споредба со 2022 година (8,3 проценти), соопшти „Евростат“.
„Покрај тоа, учеството на луѓето во ризик од сиромаштија во 2023 година на ниво на ЕУ беше 22,3 проценти, што укажува на зголемување од 2,6 п.п. во споредба со 2022 година (19,7 проценти)“, информираат од „Евростат“.
На национално ниво, најголем удел на луѓе во ризик од сиромаштија кои не можат да си дозволат соодветен оброк е забележан во Словачка (45,7 проценти), по што следат Унгарија (44,9 проценти) и Бугарија (40,2 проценти). Од друга страна, најмал удел е забележан во Ирска (4,2 проценти), потоа Кипар (5 проценти) и Португалија (5,9 проценти).
Во ЕУ, разликата меѓу вкупното население и населението во ризик од сиромаштија беше 12,8 процетни поени. На ниво на земја, Унгарија забележа најголем јаз од 30,2 п.п., следена од Словачка (27,9 п.п.) и Грција (27,3 п.п.). Спротивно на тоа, Шведска, Кипар, Луксембург, Португалија и Ирска пријавија најмали разлики, сите под 4 п.п.
Пресметките за можноста едно домаќинство да си дозволи оброк со месо, риба или вегетаријански еквивалент секој втор ден имаат за цел да се увиди стапката на тешка материјална и социјална депривација. Ова е еден од главните показатели на Европскиот столб за социјални права.
.webp){kind=icon}
