.webp){kind=icon}
Деловните очекувања во Германија останаа на најниското ниво од февруари, нагласувајќи го мрачното расположение што повторно ја зафати најголемата европска економија, откако избледе почетното закрепнување од почетокот на годината. Очекуваниот индекс на институтот „Ифо“ падна на 86,8 во август од ревидираните 87 во претходниот месец, надминувајќи ги процените на аналитичарите во истражувањето на „Блумберг“ од 85,8. Падна и барометарот на сегашните услови.
„Германската економија сè повеќе запаѓа во криза“, наведе претседателот на институтот „Ифо“, Клеменс Фуест, во изјавата во понеделникот. Тој истакна дека очекувањата се влошени и во производствениот и во услужниот сектор.
Говорејќи подоцна за телевизијата „Блумберг“, тој рече дека економијата „е заглавена во стагнација веќе некое време и се влошува - тоа го покажуваат податоците“.
Bloomberg
Оптимизмот дека Германија ќе закрепне во 2024 година по две години речиси без раст избледе, бидејќи очекуваниот скок на потрошувачката не се оствари и индустрискиот сектор во земјата продолжува да се бори.
Бруто-домашниот производ неочекувано падна за 0,1 отсто во вториот квартал, додека глобалниот индекс на менаџери за набавки на S&P остана под нивото од 50, што го дели проширувањето од контракцијата втор месец по ред во август.
Мрачната атмосфера се одрази и на индексот на доверба на инвеститорите за овој месец, објавен од институтот ЗЕВ, кој падна на најниско ниво од јануари. „Бундесбанк“ предупреди на континуирана слабост во производството бидејќи индустриските компании се соочуваат со тешка конкурентна средина.
„Потребен ни е раст на довербата на потрошувачите и инвеститорите - а тоа бара промена на политиката“, рече Фуест. „Потребен ни е посилен поттик за инвестиции“.
Олеснувањето на каматните стапки можеби е на видик. По намалувањето на трошоците за задолжување за првпат во јуни, Европската централна банка посочи дека е веројатен уште еден потег во септември.
Според Фуест, Германија може да има поголема корист од намалувањето на каматните стапки отколку остатокот од еврозоната, бидејќи заостанува зад регионот.
