Британскиот ноќен живот, кој се бореше да преживее за време на карантините, повторно се соочува со битка – овој пат со високите трошоци.
Ноќните клубови се погодени од високите сметки за струја, додека инфлацијата ја турка довербата на потрошувачите на најниско ниво и многумина се откажуваат од трошење кое не е неопходно.
Трендот се заканува да затвори дел од секторот кој помогна Велика Британија да стане туристичка дестинација со придонес од 46 милијарди фунти во годината пред пандемијата.
„Ова се тешки времиња“, вели Јанс Хес, сопственик на ноќниот клуб Egg London, во близина на Кингс крос кој исто како и многу клубови беше затворен за време на пандемијата. „Отворивме пред една година и сега се соочуваме со нови проблеми како што е инфлацијата“.
Неговите грижи се широко распространети. Пет организации, претставници на забавната индустрија, неделава ја повикаа владата итно да делува во врска со цените на енергијата. Со цени на природниот гас кои се за трипати повисоки во споредба со мај, и растечки цени на струјата, многу компании не можат да ги предвидат трошоците и ги трошат заштедите.
Bloomberg
Резултат од ова е несигурноста. Многу компании се уште не ги обновиле договорите за снабдување со гас и струја, дури 54 отсто од ноќните клубови се такви, тие пак, што ги обновиле велат дека трошоците сега се а 37 отсто повисоки во однос на времето пред пандемијата.
Марко Ди Ренцо, сопственик на ресторанот Сантони во Јоркшир, очекува зимава сметките за струја да надминат 2000 фунти месечно. Тоа е двојно од сегашните сметки. Се подготвува да го затвори бизнисот пет години по отворањето, а високите трошоци за струја се само една од причините.
„Мора повеќе да размислуваме за тоа што оваа енергетска криза му прави на бизнисот“, вели Роберт Бакли, експерт. Според него, итно е потребна акција за „да не гледаме како компании кои имаат наследство, корени во нивните средини, се уништувани“.
Сметките за струја во Британија ќе растат на есен и се очекува тогаш инфлацијата да стигне до 13 отсто. Регулаторот неделава треба да соопшти за колку ќе пораснат смектите.
Новите сметки создаваат главоболки за потрошувачите. Платите, прилагодени на инфлацијата, паднаа за три отсто во вториот квартал што е најостар пад во последните 20 години.
Според сопственикот на Egg, тоа значи дека ќе биде се потешко да собере потрошувачи.
„Ние нудиме пијачки на попуст, намалени цени за да се бориме со конкуренцијата – не наплаќаме влез и тн“, вели Хес. „Во моментов мораме да ги достигнуваме неделните цели и немаме друг начин“.
Забавната индустрија соочена со новите предизвици бара даночни олеснувања за да може да си ги подмири сметките, слично како помошта што ќе ја имаат домаќинствата.
Средба со владини претставници е закажана за септември откако новиот премиер ќе ја преземе функцијата.
„Владата не може да продолжи да ја потценува кризата“, вели Мајкл Кил, од угостителскиот сектор. „Без интервенција, бизнисите кои ја преживеаа пандемијата, поддржани од државата, се соочуваат со нова несигурност и во многу случаи ќе мора да затворат засекогаш“.
.webp){kind=icon}
