Германија би требало да го искористи наменскиот фонд за да им помогне на компаниите да се носат со економскиот удар од пандемијата и за да обезбеди кредити за енергетските компании. Државната развојна банка KfW ќе спроведува надзор преку определен механизам, а за кредити ќе бидат ставени на располагање 67 милијарди евра, информира анонимен извор запознаен со планот.
Владата на канцеларот Олаф Шолц би требало во среда на својата редовна седница да го одобри планот, смислен за да се помогне на енергетските компании, кои се принудени да плаќаат повисоки цени поради намалената испорака на природен гас од страна на Русија.
Најголемата европска економија се наоѓа во центарот од енергетската криза, додека Русија ја намалува испораката како одмазда за санкциите воведени поради војната во Украина. Расте загриженоста за тоа како Германија може да се соочи со бранот банкроти, како последица од кризата.
„Голема брзина“
Во меѓувреме, Шолц во вторникот изјави дека Германија брзо ќе го спроведе ограничувањето на цените на струјата за да им помогне на потрошувачите и компаниите да се соочат со растечките трошоци за струја. „Сега тоа ќе го протуркаме со голема брзина, за да може да се растоварат потрошувачите и компаниите кога станува збор за цената на електричната енергија“, рече Шолц во Берлин.
Најновиот план за кредитни позајмици, за кои прво известуваше весникот Ханделсблат, е одвоен од пакетот финансиска помош, што беше најавен во април, а кој што е делумно насочен за помош на енергетските компании.
Шолц се обидува да ја увери германската индустрија дека владата прави се што може за да ги реши проблемите со ликвидноста. „Ја проширивме заштитната рамка за компаниите кои се многу погодени“, рече Шолц во својот говор.
Мерките вклучуваат кредити преку Германската развојна банка и програми за позајмици и помош на енергетски интензивните компании.
Европската Унија, исто така, размислува за интервенција кај енергетските компании за да ги заузда трошоците за енергија и да обезбеди ликвидност на пазарот, кои се доведени во хаотична состојба поради ограничената испорака на природен гас од страна на Русија кон Европа. Европската комисија, како извршно тело на ЕУ, неделава ќе го претстави широкиот предлог, со кој што се настојува да се ублажат последиците од енергетската криза.
.webp){kind=icon}
Во моментов нема коментари за веста. Биди прв да коментира...