Германија ја презема контролата врз рафинерии на 'Роснефт'

Германија ја презема контролата врз германскиот оддел од руската нафтена компанија „Роснефт“ (Rosneft PJSC), што е знак дека владата на канцеларот Олаф Шолц реагира на енергетската криза без преседан, предизвикана од војната во Украина.

Сојузниот регулатор на мрежата ќе ги преземе RN Refining & Marketing GmbH и Rosneft Deutschland GmbH, кои сочинуваат околу 12 отсто од германскиот капацитет за преработка на нафта, и удели во нафтените рафинерии во Швед, Карлсруе и Вонбург, соопшти во петокот Министерството за економија.

„Потегот се спротивставува на претстојната закана за безбедноста на снабдувањето со енергија и поставува важни основи за зачувување и иднината на локацијата Швед“, се вели во соопштението на Министерството.

Ова е ескалација на економскиот конфликт со Русија и означува уште еден чекор во сè поактивната улога на Берлин во енергетската индустрија бидејќи става крај на една деценија блиска соработка со Русија.

Зголемувањето на цените на гасот и потегот на Москва да ги намали испораките за Европа веќе поттикнаа серија интервентни владини мерки. Администрацијата на Шолц, исто така, е во преговори за преземање на „Унипер“ (Uniper) и два други големи увозници на гас со цел да се избегне колапс на енергетскиот пазар, според извори запознаени со ова прашање.

Енергетската криза продолжува да ги тресе економијата и пазарите во регионот, дури и додека Европската унија и националните влади се брзаат да создадат нови алатки за да ги олеснат финансиските тешкотии.

Германија е особено тешко погодена поради нејзината зависност од рускиот увоз на енергија. BNetzA ја предупреди Германија дека може да се соочи со бранови на недостиг во случај на студена зима и ги повика големите индустриски потрошувачи да ја намалат потрошувачката на гас за да избегнат задолжителна рационализација.

Клучна рафинерија

Преземањето на Rosneft Deutschland има за цел да ја обезбеди работата на рафинеријата Швед во близина на полската граница, која го снабдува најголемиот дел од авионското гориво за аеродромот во германската престолнина и бензин за возилата во регионот. Објектот традиционално се потпира на нафтоводот „Дружба“ од Русија за снабдување со сурова нафта.

„Оваа одлука е придружена со сеопфатен пакет за иднината, кој ќе обезбеди трансформациски поттик за регионот и ќе ја поддржи рафинеријата да обезбеди снабдување со нафта преку алтернативни рути“, соопшти Министерството.

Шолц и министерот за економија, Роберт Хабек, ќе претстават детали од планот за национализација на прес-конференција во Берлин подоцна во текот на денот.

Во моментов нема коментари за веста. Биди прв да коментира...

Остави коментар