.webp){kind=icon}
Кредитниот рејтинг ББ+ со негативен изглед е потврден во најновиот извештај на Агенцијата за кредитен рејтинг „Фич“ (Fitch), информираат од Министерството за финансии од каде нагласуваат дека одлуката на Агенцијата е резултат на спроведувањето добри политики на владеење, кредибилна и кохерентна макроекономска и финансиска политика конзистентна со долго-одржуваниот фиксен девизен курс.
Од ресорното министерство посочуваат дека Fitch во извештајот наведува оти почетокот на интегративниот процес со ЕУ ќе ја зацврсти политиката, ќе го поддржи извозот и приливот на странски директни инвестиции, со што ќе се избалансираат негативните влијанија од конфликтот во Украина.
„Агенцијата предвидува дека интензивирањето на ефектите на енергетската криза и очекувањата за контракција во еврозоната ќе влијаат врз растот на македонската економија, кој ќе остане во позитивна зона, а со намалувањето на геополитичките ризици и притисоците на цената на енергијата, подобрување на надворешната побарувачка, како и со постепената фискална консолидација се очекува растот на економијата да забрза и да достигне 3,2 отсто од БДП во 2024 година“, се наведува во соопштението на Министерството за финансии.
Агенцијата, исто така, предвидува зголемување на странските директни инвестиции до 4 отсто од БДП во 2022 година поради континуираните инвестиции во енергетскиот и автомобилскиот сектор.
Според Fitch, владините реформи, како и поддршката на ММФ преку Линијата за претпазливост и ликвидност (PLL) ќе ја зајакнат фискалната консолидација, што би довело до намалување на фискалниот дефицит и стабилизација на долгот. Усвојувањето на новиот Закон за буџети ќе придонесе за зајакнување на фискалната рамка на земјата, преку воведување фискални правила и формирање фискален совет.
Во врска со буџетскиот дефицит за 2022 година, Агенцијата наведува дека мерките што ги презема Владата како одговор на ценовната и енергетската криза во износ од 750 милиони евра, ќе влијаат врз буџетскиот дефицит во 2022 година, кој Fitch очекува да се намали од 2023 година со повлекување на потребата од мерки за поддршка на населението и компаниите. Исто така и во однос на државниот долг Fitch очекува тој да достигне 55,2 отсто од БДП до крајот на оваа година и 56 отсто од БДП до 2023 година.
Кредитниот рејтинг на една земја го покажува степенот на ризик од инвестирање во неа, и е еден од клучните индикатори коишто потенцијалните инвеститори ги земаат предвид при носење на нивните одлуки.
Претходно кредитниот рејтинг на С. Македонија го потврди Агенцијата „Стандард и Пурс“ (Standard & Poor's) на ББ- со стабилен изглед.
