Јавните претпријатија во моментов само на една компанија трговец со електрична енергија ѝ должат 5,5 милиони евра. Од „Енерџи деливери солушнс“ (Energy Delivery Solutions - ЕДС) велат дека овој долг им е доста голем проблем во моментов. Компанијата е во топ три што се најголеми доставувачи на струја за државните и општинските компании.
Оттаму велат дека драстичниот раст на цената на електрична енергија предизвика неизвесност кај компаниите, а тоа, пак, предизвика проблеми и во наплатата на испорачаната електрична енергија.
„Она што нам ни претставува загриженост во изминатиот период, а стравуваме дека доколку не се најдат соодветните механизми, ќе продолжи да биде проблем и во наредниот период, е наплатата од јавните претпријатија, особено од оние чии основачи се единиците на локалната самоуправа. За да обезбедиме непречено снабдување со енергија, особено во ситуација кога цената на електричната енергија се менува од час на час, а ЕДС ја плаќа авансно, односно однапред, континуитетот на снабдување за целата балансна група понекогаш зависи од ажурноста со која клиентите ги намируваат своите финансиски обврски во согласност со договорите. Нашата компанија има целосно разбирање за предизвиците со кои се соочуваат сите деловни субјекти, во енергетска и во финансиска смисла, и кога некои од нашите клиенти ќе се соочат со сериозно доцнење со плаќањето, се обидуваме да постигнеме договор во заемен интерес, како плаќање на долгот на рати, но, за жал, понекогаш доаѓаме во ситуација во која за да ги заштитиме целата балансна група и стабилноста во снабдувањето, принудени сме да ја прекинеме испораката кон некој од клиентите“, вели Димитар Ивановски, раководител на правен оддел во ЕДС.
Во овој момент, балансната група што ЕДС ја снабдува со електрична енергија ја сочинуваат 578 правни субјекти, од кои 264 се јавни претпријатија и институции, а 314 се приватни компании.
Оттаму апелираат до општините, јавните претпријатија и јавноста дека во постојните услови во енергетскиот сектор од клучно значење се редовното и навремено намирување на сметките за електрична енергија, разумното и одговорно планирање на буџетите за потрошувачка на електрична енергија од страна на надлежните сектори во општините и јавните претпријатија и, секако, рационалното користење на енергијата.
Планот на компанијата е во наредниот период да продолжи со добрите деловни практики, да го инкорпорира корпоративниот бренд на PPC SA во своето работење и континуирано да го зголемува своето портфолио.
„Во текот на 2021 и 2022 година, ЕДС забрзано го зголеми своето портфолио на клиенти, откако многу наши конкуренти им ги откажуваат договорите на потрошувачите. Нашите интерни процени се дека во моментов на македонскиот енергетски пазар имаме учество поголемо од 30 отсто од отворениот дел од пазарот. Наша цел е да го зголемиме тој процент до крајот на годината и со тоа темпо да продолжиме и во текот на 2023 година. Уверени сме дека на македонскиот пазар во моментов ЕДС е најдобрата опција за снабдување со електрична енергија на слободниот пазар, имајќи ги предвид нашата понуда, која е особено поволна за клиентите, предвидливоста што има ја овозможува во однос на планирањето на нивните трошоци и, секако, гаранцијата дека секогаш ќе имаат навремена и непрекината испорака“, вели Илијас Тсукалас, главен финансиски директор.
И покрај неизвесноста што ја носи енергетската криза, од ЕДС велат дека можат да гарантираат сигурна и стабилна испорака на електрична енергија. Очекувањата се дека ЕДС ќе ја заврши 2022 година со вкупно учество од 33 отсто на македонскиот пазар за квалификувани потрошувачи.
„На нашиот пазар, ЕДС е компанија со најголем основачки капитал, од близу 5,5 милиони евра, и со тоа ЕДС ја гарантира својата стабилност пред домашните комерцијални банки, кои нѐ поддржуваат во нашето оперативно работење. ЕДС никогаш не откажала и нема да откаже договор поради неможност да набави енергија. Нашите сопствени финансиски капацитети, поткрепени дополнително со корпоративна гаранција од нашата фирма-мајка (PPC SA) се сосема доволни да обезбедиме енергија за целата наша балансна група. Во моментов, следејќи ги пазарните движења на цените, како и однесувањето на конкуренцијата, покрај веќе склучените договори, за кои гарантираме испорака на енергија во согласност со договорените цени, за нови договори нудиме модел на претплата, со што компаниите можат да заштедат уште некој процент од цената, бидејќи претплатата на ЕДС ги намалува финансиските трошоци за користење рамковни кредити од комерцијалните банки. Претплатата може да биде месец за месец или на годишно ниво, за што следува дополнителен попуст“, вели Златко Черепналкоски, извршен директор за продажба и маркетинг во ЕДС.
ЕДС
Во текот на октомври годинава, компанијата одбележи десет години на македонскиот енергетски пазар.
Преку деловната одлука на грчката национална енергетска компанија PPC SA (Public power corporations) стратегиски да инвестира во Република Северна Македонија, ЕДС во 2018 година стана дел од корпорацијата што важи за енергетски гигант во Југоисточна Европа.
„Особено сме горди на она што го постигна ЕДС во изминатите десет години. Остануваме лидери на македонскиот пазар, кој снабдува електрична енергија кон најголемата балансна група и има најголемо учество на македонскиот пазар. Наша цел е да продолжиме во таа насока и во наредниот период, да го зацврстиме и зголемиме нашето учество на пазарот и да ги подобриме услугите кон нашите клиенти. За таа цел, во пресрет на јубилејот, изградивме нова интернет-страница, која во наредниот период ќе им овозможи на клиентите да користат на нови дигитални услуги, како електронско фактурирање и плаќање, а ќе инкорпорираме и онлајн платформи за контрола и за увид во потрошувачката на електрична енергија“, истакна по повод одбележувањето главниот извршен директор на ЕДС, Јанис Јанопулос.
.webp){kind=icon}
