.webp){kind=icon}
Поради преминувањето од слободен на регулиран пазар на дел од општините и некои приватни фирми се потрошија дополнителни 30 милиони евра за увоз на струја, вели претседателот на Регулаторната комисија за енергетика (РКЕ) во разговор за Блумберг Адрија ТВ.
„Трендот на преминување од слободниот на регулираниот пазар на електрична енергија, за жал, прво започна со општините во државата и повеќето од нив за да си ги намалат своите трошоци за јавно осветлување формираа помали фирми што ќе се занимаваат со јавното осветлување, а потоа тоа се одложи и кај компаниите во државата. РКЕ го забележа овој тренд во март-април 2022 година и за тоа ги информира соодветните институции“, вели Марко Бислимовски, претседател на Регулаторната комисија за енергетика.
Владата веќе донесе одлука со која на сите потрошувачи што на тој начин се префрлија на регулираниот пазар во претходниот период им наложува од 1 јануари да се вратат на слободниот пазар на електрична енергија.
„До 30 јуни поради овој тренд беше направен непланиран увоз на електрична енергија од 30 милиони евра. Започнувајќи од 1 јули досега не е направен никаков увоз. Но овие количества наместо ЕСМ да ги пласира на регулираниот пазар по цена од 48 евра за мегават-час, таа електрична енергија може да ја продава на слободниот пазар по многу повисоки цени“, вели Бислимовски.
Според претседателот на РКЕ, цената на струјата следната година најмногу ќе зависи од домашното производство.
„Треба да видиме како ќе заврши оваа година, а знаеме дека производството ќе биде повисоко за 20 проценти од 2021-та, па тогаш да ги видиме плановите за 2023 година. Да видиме прво и каква ќе биде побарувачката и дали ЕСМ ќе може да ја задоволи, па врз основа на тие анализи ќе носиме одлуки. Најбитно е нашето домашно производство да го зголемуваме за да избегнеме ситуации кога мора да се прави увоз“, вели Бислимовски.
Во разговорот за Блумберг Адрија ТВ, Бислимовски зборува и за грејната сезона и загадувањето што може да се предизвика од користењето различни извори на енергија.
