Имајќи предвид дека македонската економија е зависна од увоз на струја, стапката на инфлација во октомври не е за изненадување, вели Глигор Бишев, надворешен советник на премиерот, во разговор за Блумберг Адрија ТВ.
„Тоа што е добра вест е дека трајната инфлација е околу 6,5 проценти. И тука, како и на светско ниво, главен инструмент за борба против инфлацијата ќе биде монетарната политика, а тоа значи дека ќе имаме рестриктивна монетарна политика, што значи зголемување на каматните стапки, а фискалната политика ќе се нормализира по својата експанзија во периодот на ковидот“, вели Бишев.
Интервенциите за помош, според него, ќе бидат строго насочени, за да бидат помогнати само најранливите групи, а тоа значи дека не може да се очекува сеопфатна поддршка, како што беше во времето на ковид-кризата.
„И тука клучно ќе биде да не се дозволи развој на спиралата цени-плати-цени“, вели Бишев.
Неговата прогноза за движењето на референтната каматна стапка е дека ќе се зголеми за најмалку уште еден процентен поен.
„И монетарната политика е увозна. Во моментов, базичната каматна стапка на ЕЦБ е два отсто, на НБРМ е 3,5 проценти. Се очекува ЕЦБ до првиот квартал идната година да стигне до 3 проценти, а тоа значи дека во Македонија би била некаде меѓу 4,5 и 5,5 проценти“, вели Глигор Бишев.
Советникот во премиерскиот кабинет очекува дека долгот ќе се намалува.
„Имајќи предвид дека финансиските институции од кои се задолжуваме моментално имаат номинална каматна стапка меѓу еден и 1,5 процент и имајќи предвид дека проекцијата на долгорочниот раст на БДП е околу 4 до 4,5 проценти, може да се очекува дека доколку се остварат овие прогнози на економски раст, задолжувањето ќе се намалува“, вели Бишев, потенцирајќи дека од особена важност е начинот на кој ќе се трошат позајмените пари.
Погледнете го видеото со целиот разговор со Глигор Бишев, надворешен советник на премиерот, за Блумберг Адрија ТВ.
.webp){kind=icon}
