Во Македонија континуирано се одвива и надворешна и внатрешна миграција, а жените мигрираат повеќе отколку мажите, покажуваат податоците на Државниот завод за статистика(ДЗС). Преселбата на населението предизвикува големи демографски промени во изминативе години.
Внатрешната миграција се одвива кога луѓето се преселуваат од руралните средини во урбаните средини, а најголемите миграциски текови се одвиваат кон главниот град Скопје.
„Во периодот од 2000 до 2015 година, годишниот број жени што се преселиле во главниот град е постојано двојно поголем од бројот на мажи. Во последните пет години трендот на миграција кај жените останува висок, додека миграцијата на мажите се зголемува“, се вели во новата публикација „Жени и мажи“ на ДЗС, која претставува статистичкиот портрет на трендовите од областа на родовата еднаквост во Македонија.
Во неа се вели дека демографските промени кај населението може да се објаснат и со интензивниот миграциски одлив по визната либерализација во ЕУ во 2009 година и поповолните миграциски режими во одредени европски земји, како што е Германија, кои поттикнаа цели семејства да се преселат во странство. Истовремено, студентската размена и програмите за работа и патување станаа многу популарни. Ваквите можности веројатно придонесоа за особено намалување на населението од две возрасни групи: 15 – 19 години и 20 – 24 години.
„Не постои темелна анализа на родовите карактеристики на миграцијата, делумно поради тоа што податоците се различни и нема официјална статистика за ова прашање. Одредени податоци укажуваат дека во претходните бранови на миграција (во 90- тите години на 20 век, на пример) преовладувале мажите, но ова веројатно се променило во текот на 2000-тите, а особено во текот на 2010-тите. На пример, базата на податоци на Институтот за истражувања за вработување (ИАБ) содржи податоци поделени по пол за македонската емиграција во напредните економии (каде што живее најголемиот дел од македонската дијаспора) што покажуваат процент од 52,4 проценти мажи и 47,6 проценти жени“, се вели во публикацијата.
Надворешната миграција се одвива кога луѓето ги преминуваат државните граници и остануваат во државата домаќин со намера трајно или привремено да се населат на ново место. Факторите што поттикнуваат надворешна миграција обично, меѓу другото, се економски, политички, верски, поврзани со семејството и домаќинството, или со животната средина.
Податоците од ЕУ35 потврдуваат дека се во пораст миграциските текови од Македонија кон земјите членки на ЕУ. Граѓаните на Македонија сочинуваат 7 проценти од граѓаните на земјите кандидатки и потенцијални кандидатки на кои им се издадени први дозволи за престој во земјите членки на ЕУ во 2020 година. Македонските граѓани добиле 29 проценти повеќе први дозволи за престој во 2020 година во споредба со 2010 година.
„На крајот на 2020 година, 3,8 милиони граѓани на земјите кандидатки и потенцијални кандидатки имале валидни дозволи за престој во земјите членки на ЕУ, а 5 проценти од нив, или приближно 190.000 валидни дозволи за престој имале граѓани на Македонија. Истата година, 93.000 граѓани на земјите кандидатки и потенцијални кандидатки стекнале државјанство на земја членка на ЕУ, а 5 проценти или приближно 4.650 од лицата што се стекнале со државјанство на земја членка на ЕУ биле од Македонија. Во периодот од 2010 до 2020 година бројот на граѓани од Северна Македонија што стекнале државјанство на ЕУ се зголемил за 52 проценти“, укажуваат од ДЗС.
.webp){kind=icon}
