Белградската компанија „Делта инженеринг“ го доби тендерот на државното претпријатие за вршење енергетска дејност, пренос на природен гас „Номагас“, за да направи урбанистички проект и студија, односно елаборат, за процена на еколошкото влијание за изградба на магистрален гасовод на делницата 7, или од Кичево до Охрид. За оваа работа белградската компанија и скопската фирма „Коленко“ ДООЕЛ, која учествува во набавката, ќе добијат над 570 илјади евра. Ова е најскап оглас за ваков елаборат што „Номагас“ го плаќа воопшто. Имено, на тендер што беше објавен во 2020 година, а кој тогаш го доби кумановската фирма „Простор“ ДОО, беа платени 335 илјади евра за договор со иста набавка - изработка на инфраструктурен проект, судија за оцена на влијанието врз животната средина, но тогаш тој беше за делницата Свети Николе - Велес.
Инаку, „Номагас“ е новото државно акционерско друштво што произлезе по спојувањето на АД „Национални енергетски ресурси“ (НЕР) и АД ГА-МА Скопје, откако во август лани беше објавена одлуката за нивно спојување.
Во договорот со „Делта инженеринг“ е наведено дека овој проект треба да биде готов најмногу 24 месеци од склучувањето на договорот. За тие две години, секако, нема ни да почне да се гради гасоводот на таа делница.
А сите рокови поврзани со гасификацијата во Македонија се пробиени. Објавата на тендер за избор на друштво за идеен инфраструктурен проект, АД НЕР ја стави во програмата и требаше да се реализира во 2021 година, но договорот е склучен на 9 јануари 2023 година.
Како што веќе пишувавме, националниот гасовод во земјава почна да се гради на почетокот на 2015 година. Првата делница Клечовце – Штип, долга 61 километар, беше најбрзо изградена (завршена е во јуни 2016), но беше и најскапа. Таа чинеше 75,7 милиони долари, 60 милиони од нив беа обезбедени со затворање на клириншкиот долг од Русија, остатокот беше од буџетот.
АД „Национални енергетски ресурси“
Втората делница од Штип до Неготино почна да се гради во јуни 2016 и беше готова на крајот на 2018 година. Таа е долга 36 километри. Требаше да чини 15,8 милиони евра, на крајот сметката изнесуваше 18,6 милиони.
По завршувањето на втората делница, изградбата забави. Делницата од Неготино до Битола почна да се гради во 2017 година, а со која динамика се работеше покажува податокот дека на крајот на 2020 година на оваа делница фалеа уште 2,5 километри. Во ноември 2022 година, дури и премиерот Димитар Ковачевски присуствуваше на заварувањето на последната цевка на делницата од Неготино до Битола.
Во 2021 година требаше да заврши и изградбата на делницата од Скопје до Гостивар, која е почната во 2016 година. Таа е со должина од 77 километри (плус 10 километри крак кон Тетово). Пред две години од неа беа изградени 66 отсто, заклучно со август 2022 се реализирани 82,65 отсто. Сега работите се стигнати до реализација до 91 процент. Оваа делница ќе чини 29 милиони евра.
Процените велат дека за да се заврши националниот гасовод, ќе бидат потребни 200 милиони евра, а до 2025-та гас треба да има во секој дом.
.webp){kind=icon}
