.webp){kind=icon}
Статистичките податоци за инфлацијата во Македонија се добра вест, бидејќи по повеќе месеци забележуваме дека растот на цените почнува да стагнира, вели Марјан Петрески, универзитетски професор, во разговор за „Блумберг Адрија“, во емисијата „Зум ин“.
„Годинава стапката на инфлација ќе остане релативно висока, меѓутоа сепак пониска споредено со претходната година. Тоа очекување главно се темели на преносните ефекти од шоковите од минатата година, натамошната неизвесност околу војната во Украина и сè уште присутните отежнати синџири на снабдување, кои особено ги засегаат одредени индустрии што се присутни и во Македонија“, образложува Петрески.
Според универзитетскиот професор, временски е тешко да се предвиди кога ќе се врати инфлацијата на она разумно ниво од два процента поради многуте непознаници во кои живееме.
„Но главна улога во тој дел ќе имаат банките и монетарната политика, како и олабавувањето на тесните грла кај синџирите за снабдување. Секако, и други фактори се значајни. Во секој случај, значајно намалување на инфлацијата ќе видиме во 2024 година. Тука, за Македонија, конкретно е важна и фискалната политика, која во моментот ја ограничува комфорноста за менаџирање со инфлацијата“, вели Петрески.
Тој зборува и за причините зошто во Македонија стапката на инфлација е повисока од многу европски земји и држави од регионот, за каматните стапки и натамошниот развој на монетарната политика во Македонија, но и во Европа и САД. Професорот зборува и за данокот на екстра-профит, како и за стравувањата во врска со можна рецесија.
Целиот разговор со универзитетскиот професор Марјан Петрески погледнете го во првиот дел од видеото.
