.webp){kind=icon}
Забележана е појава на големи количества фалсификувани монети на евра во Македонија, открива Народната банка во годишниот извештај за 2022 година. Во рамките на своите надлежности, како единствена овластена институција за утврдување на автентичноста на книжните и кованите пари деноминирани во денари и во странски валути, Народната банка лани открила вкупно 13.983 парчиња фалсификувани монети на евра, и тоа 13.583 парчиња во апоен од две евра, 321 парче во апоен од едно евро и 79 парчиња во апоен од 50 центи.
По извршените експертизи на доставените сомнителни книжни и ковани пари деноминирани во странски валути во 2022 година, од вкупно 506 направени анализи се утврдени 224 фалсификувани пари и 282 оригинални пари. Во вкупниот број фалсификувани книжни пари, најзастапени се книжните пари во евра (181 парчe) и американски долари (38 парчиња).
„Општата оцена е дека фалсификуваните книжни пари имаат релативно лош квалитет на изработка, што овозможува едноставно и лесно откривање и утврдување на нивните карактеристики. При експертизата на техниката на изработка на фалсификуваните книжни пари, утврдено е дека тие се изработени главно на обична хартија, без доволно заштитни елементи, со користење компјутерска техника (скенирање и печатење) или, пак, со користење фотокопир во боја“, објаснуваат од Народната банка.
При експертизите на доставените сомнителни книжни пари деноминирани во денари, кои се извршени во текот на 2022 година, се утврдени 305 фалсификувани примероци, што претставува зголемување за 32 процента во однос на утврдените фалсификувани книжни пари откриени во текот на 2021 година.
„Во вкупниот број откриени фалсификувани книжни пари во 2022 година, најзастапен е апоенот од 2.000 денари ‒ 269 парчиња, или 88,2 проценти од вкупниот број фалсификати, потоа следуваат апоенот од 1.000 денари ‒ 13 парчиња, или 4,3 проценти од вкупниот број фалсификати и апоенот од 500 денари ‒ 12 парчиња, или 3,9 проценти од вкупниот број фалсификати. Вкупната вредност на фалсификуваните денари во 2022 година изнесува 558.100 денари и има незначително учество во однос на вкупната вредност на парите во оптек“, велат од Народната банка.
Оттаму информираат дека поради мерките за превенција од ширење на вирусот ковид-19, Народната банка и во текот на 2022 година ги одложила специјализираните обуки на вработените во банките и центрите за готовина, како и обуките планирани во согласност со националниот план за обуки, во чии рамки експертите на Народната банка требало да обезбедат обуки за полициските службеници и вработените во другите институции вклучени во борбата против фалсификувањето пари.
