.webp){kind=icon}
Пред две години бомбастично најавениот проект тежок половина милијарда евра, сѐ уште не може да се реализира. Се работи за ветерната електрана која германската компанија ВПД треба да ја гради во регионот на Куманово – Старо Нагоричане – Крива Паланка.
Ветерната електрана од 415 мегавати беше најавена на прес конференција во октомври 2021 година кога тогашниот премиер Зоран Заев ја нарече највредна странска инвестиција во земјава.
„Ова не е само најголемата германска инвестиција во земјата, ова е најголемата директна гринфилд инвестиција во македонската економија од независноста до денес. Таа е доказ дека зеленото сценарио е возможно. Овој проект е повеќе од половина капацитетот од 700 мегавати предвидени со стратегијата“, најави тогаш премиерот Зоран Заев на посебна презентацијата на проектот.
Твитер - профил на поранешниот македонски премиер Зоран Заев
Проценетата вредност на проектот изнесува околу 500 милиони евра, беше најавено дека ќе биде готов за шест години, а дека треба да обезбеди струја за 290.000 домаќинства. На прес конференцијата, сериозната на проектот со своето присуство ја гарантираше и поранешната германска амбасадорка во земјава, Анке Холштајн.
Таа тогаш изјави дека 69 – те ветерници ќе овозможат годишно намалување на загадувањето за 310.000 тони јаглерод диоксид.
Две години подоцна, „Блумберг Адрија“ го праша германскиот заменик амбасадор во земјава, Ото Граф до каде е реализацијата на проектот.
„За проектот има политичка одлука, но се уште чекаме на крајниот потпис. Оптимисти сме дека ќе го добиеме потписот, во основа тоа ќе биде најголемата инвестиција некогаш овде спроведена од наша страна“, рече Граф.
Прес - конференција на Германската стопанска комора и германскиот амбасадор
На прашањето чиј е потписот што недостига, заменик амбасадорот низ смеа ни рече да почекаме за деталите.
„Ве молам за разбирање што не смеам тоа овде јавно да го кажам, но ние сме секојдневно во преговори и недостасуваат последните детали и во секој случај сме големи оптимисти“, вели тој.
Компанијата која треба да го реализира овој голем енергетски проект наречен „Вирови“, ВПД, склучи договор за стратешко партнерство со Владата на 45 години, работи во 28 земји и произведува кај 5.000 мегавати струја на час.
