Македонскиот економски модел нема капацитет да испорача повисоки стапки на економски раст, а главен ограничувачки фактор е ниската конкурентноста на економијата и слабостите на извозниот сектор, вели во интервју за Блумберг Адриjа TВ, Дарко Лазаров – претседател на Клубот на извозници при Стопанската комора.
„Првата причина е високата извозна концентрација на македонскиот извоз од аспект на мал број на извозни компании, мал број на извозни производи и прилично неповолна извозна структура на македонската економија, пред се на домашниот извозен сектор којшто е сконцентриран во дејности со ниска додадена вредност, пред се тука мислам на примарно земјоделие, базична металургија, облека и текстилна индустрија, а од друга страна оние компании, странски компании коишто работат во и надвор од технолошко-индустриските развојни зони, а извезуваат производи коишто имаат релативно повисоко ниво на комплексност, односно софистицираност, многу мал дел од таа додадена вредност на тие производи ја создаваат во домашната економија и причината за тоа секако е тој голем гап којшто постои помеѓу локалната економија од една страна и производните процеси на компаниите во технолошко-индустриските развојни зони. И оваа слика, едноставно, мора како земја да ја промениме доколку сакаме подобри перформанси на македонската економија во наредниот период, затоа што и економската теорија и практичните искуства на успешните брзорастечки земји укажуваат дека токму извозните перформанси треба да бидат клучот за растот и развојот на една економија, вклучувајќи ја и македонската економија“, вели Лазаров.
Високата извозна концентрација пак, ја изложува економијата и на високи ризици од влијание на случувањата на другите меѓународни пазари, како на пример техничката рецесија во Германија.
„Она што е уште понеповолно е што и во рамки на ЕУ ние имаме прилично висока извозна концентрација, така што падот на побарувачката, особено на побарувачката од ЕУ, од Германија, може навистина преку ноќ да ја смени во неповолна смисла состојбата со македонскиот извоз, а тоа да има негативни импликации и врз македонската економија“, вели Лазаров.
Лазаров потенцира дека за подобрување на трговската размена на Македонија требаат конкретни мерки за помош и од државата.
„Состојбите на меѓународен план се неизвесни, но ние како земја треба да работиме на јакнење на извозниот капацитет. Стопанската комора на РСМ во изминатиов период активно се вложува во оваа насока, но сметаме дека поддршката од државата е недоволна и таа час поскоро треба да се стави на функција на овој врвен национален приоритет бидејќи сметаме дека само така можеме да излеземе од оваа криза како економија, но и да создадеме сериозни развојни капацитети во иднина коишто ќе овозможат посериозен исчекор на Македонија односно побрза динамика на конвергенција на македонската економија кон ЕУ, бидејќи залудни ќе бидат обидите за интеграција на државата кон ЕУ, ако во исто време не работиме на јакнење на капацитетот на приватниот сектор, особено на извозно-ориентираните компании“, вели Лазаров.
.webp){kind=icon}
Во моментов нема коментари за веста. Биди прв да коментира...