Обемот на трговската размена лани се намалил за 3,3 проценти, а конкретно извозот од земјава паднал за 6,6 отсто, покажуваат податоците од Државниот завод за статистика (ДЗС).
Податоците покажуваат дека лани се извршила стоковна размена во вкупна вредност од 18,84 милијарди евра, од кои извозот учествува со 7,78 милијарди евра. Според тоа, трговскиот дефицит изнесува 3,28 милијарди евра.
„Вкупната вредност на извозот на стоки од Македонија во периодот јануари-декември 2024 година бележи пад од 6,6 проценти во однос на истиот период од претходната година. Вредноста на увезената стока е за 0,8 проценти помала во споредба со истиот период од претходната година. Покриеноста на увозот со извоз, во периодот јануари-декември 2024 година изнесува 70,3 отсто“, пишува во соопштението од ДЗС.
Прочитај повеќе
Рекордни нивоа на трговската размена на ЕУ на земјоделски производи
Во октомври 2024 година извозот на земјоделски производи од ЕУ достигна вредност од 21,7 милијарди евра, а увозот 16,2 милијарди евра
25.01.2025
На македонскиот извоз не му се пишува добро ни во 2025 година
Над 40 проценти од извозот на Македонија оди во Германија, а тој паѓа неколку месеци по ред.
15.01.2025
Наплив на турски инвестиции во Македонија, голем интерес за енергетиката
Вкупните директни инвестиции од Турција во Македонија изнесуваат две милијарди евра, а половина од странските работници во земјава се Турци.
31.01.2025
Најголем раст на извозот има кај храната и живите животни (10,6 проценти), пијалаци и тутун (8,5 отсто), како и животински и растителни масла, масти и восоци (41,4 отсто). Од друга страна, најголем пад на извозот се забележува кај минералните горива, мазива и сродни производи (-21,5 проценти), хемиски и сродни производи (-20,3 отсто) и разни готови производи (-6,6 отсто).
„Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично за возила, авиони или бродови, деловите на седишта од подгрупата 821.1 и други катализатори на носачи. Во увозот најмногу се застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, платината и легурите на платина, необработени или во прав и други моторни возила за превоз на лица“, посочуваат од ДЗС.
Сѐ подебел е минусот со Германија
Според вкупниот обем на надворешнотрговската размена, Македонија најмногу тргува со Германија, Велика Британија, Грција, Кина и Србија. Кризата во Германија, која е најголем трговски партнер на земјава, сѐ повидливо се отсликува и кај нас преку намалување на нарачките од македонските фабрики. Процентуално извозот за Германија во 2024 година е за 15,5 проценти помал од 2023 година, а во апсолутен износ тоа значи дека биле извезени стоки во вкупна вредност 3,09 милијарди евра, што е за 568 милиони евра помалку од 2023 година. Притоа, важно е да се знае дека за Германија одат 45 проценти од вкупниот извоз на земјава, а таа држава има удел од 27 проценти во вкупната трговска размена на Македонија.
Но воопшто не е наивен падот на извозот ниту со другите најголеми трговски партнери на Македонија. Кон Велика Британија се испратени за 19,3 отсто помалку стоки, извозот кон Грција паднал за 14,5 проценти, а кон Кина е буквално преполовен. Ако се набљудуваат петте најголеми трговски партнери, Македонија бележи раст на извозот единствено кон Србија, и тоа за 11,8 проценти.
Според класификацијата на производите по дејности, извозот забележително пораснал единствено кај земјоделските производи, за 10,6 проценти, додека падот е особено видлив кај преработувачката индустрија (-7,1 отсто) и електричната енергија, гасот, пареата и климатизацијата (-21,8 отсто).
.webp){kind=icon}
