Владата ќе го прекројува буџетот заради покачувањата на платите

До крајот на оваа недела Министерството за финансии ќе заврши со постапката за прекројување на буџетот. Очекувањата се дека предлогот ќе се најде на владина седница наредниот вторник, а веднаш потоа ќе влезе и во собраниска процедура.

Овој пат државата не се одлучила за класичен ребаланс туку за прераспределба на средства на расходната страна. За овој процес собраниската постапка трае пократко.

„Ребаланс на буџет се прави кога имате проблем на приходната страна. Ние таму имаме зголемени приходи од близу 12 отсто. Затоа ќе одиме со прераспределба на средствата на расходната страна“, вели во изјава за „Блумберг Адрија“ заменик-министерот за финансии Филип Николовски.

Што и од каде ќе се распределува, Николовски не откри со образложение дека се прават последните пресметки и анализи. Тој вели дека ќе има приспособувања на расходната страна за да обезбедат пари за најавените покачувања на платите во јавниот сектор, кои не беа најавени со буџетот за 2023 година.

Немаме проблем со собирањето на приходите

Анализата на бројките за реализација на буџетот заклучно со јули покажува дека државата собрала околу 48 отсто од планираните пари по основа на данок на додадена вредност, или кусокот во буџетот по оваа основа изнесува 112 милиони евра. Според многумина, тоа е доволно за вклучување на алармот дека полнењето на буџетот оди со тешкотии или, пак, дека државата лошо прогнозирала. „Блумберг Адрија“ уште пред два месеци пишуваше на таа тема.

Според Николовски, пак, на бројките во буџетот не може да се гледа така. „Не може да се споредува месец за месец од две различни години, затоа што состојбите не се исти. Ако гледате така, кај данокот на добивка во моментот наплатата е 75 отсто од планираното. Ние кога сме ги правеле проекциите, тоа сме го правеле на годишно ниво“. 

Пренамена односно прераспределба на средства последен пат имаше лани во декември. Неискористените или средствата за кои се знае дека нема да се реализираат се пренаменуваат таму каде што се потребни. Во случајов за да се исплатат повисоките плати за 10 отсто што Владата му ги вети на синдикатот.

Кој потрошил најмалку?

Во земјава стана вообичаена практика да се крати од сумата за капитални инвестиции. Секоја година кога се носи буџетот оваа ставка неосновано расте, се претвора во список на желби, а парите не се реализираат – што поради немањето проекти, што заради бавната администрација.

Во согласност со податоците на Министерството за финансии, заклучно со јуни реализацијата на капиталните проекти изнесува 46,84 отсто. Најмалку пари потрошиле министерствата за одбрана, земјоделство, образование, труд и социјална политика.

Во моментов нема коментари за веста. Биди прв да коментира...

Остави коментар